Бир неча йил олдин Жорж Клунига Голливуднинг энг келишган бўйдоғи сифатида қаралар эди ва у ўша вақтларда оила қуришни хаёлига ҳам келтирмасди. Аммо халқаро ҳуқуқшунос Амал Аламуддин билан учрашув унинг ҳаётини тубдан ўзгартириб юборди. Натижада актёр вафодор эр ва меҳрибон ота мақомига эришди. Grazia нашри 61 ёшли актёрнинг туғилган куни муносабати билан ҳуқуқ ҳимоячиси қандай қилиб чинакамига унинг муҳаббатига сазовор бўлгани ҳақида сўз юритди.
Жуфтлик 2013 йилда тасодифан Италиянинг Комо кўлида жойлашган Клунининг уйида учрашишган. Амал у ерга Канн фестивалига келган умумий дўсти туфайли борганди. Йўл-йўлакай саёҳатчилар актёрнинг уйида меҳмон бўлди. Бу вақтда Клунининг ота-онаси ҳам ўғлининг кошонасига ташриф буюрган эди, шунинг учун улар дарҳол Амал билан ҳам танишиб олган.
«Ҳақиқат шуки, мен нафас олишдан тўхтаб қоладиган даражада бу ажойиб аёлни учратдим. У латофатли, қувноқ, чиройли ва меҳрибон эди. У мени том маънода ўзига ром этди», — деб эслайди Жорж у билан биринчи учрашувини.
Бир неча ҳафта давомида жуфтлик электрон почта орқали ёзишиб, телефонда гаплашди. Жорж айтиб ўтганидек, вақт ўтиши билан улар шунчаки дўст эмаслиги маълум бўлди.
Биринчи учрашув
Улар танишганидан уч ой ўтиб, биринчи расмий учрашувга Жорж Амални Лондондаги машҳур Аббей Road студиясига таклиф қилди, у ерда у «Хазина овчилари» фильмида суратга тушаётган эди. Кейин улар шаҳардаги машҳур ресторанлардан бирига романтик кечки овқат учун борди. Ўша вақтдаёқ папарацсилар аллақачон уларнинг фаол равишда кузатиб борган. «Биз ресторандан чиққанимизда 50 нафар сураткаш кутиб турган эди. Аммо Амал ўзини жуда ажойиб тутди», — деди актёр.
Кутилмаган унаштирув
Орадан олти ой ўтгач, Жорж ўз севгилисининг қўлини сўради, Амал буни умуман кутмаган эди. Қизнинг ота-онаси актёрнинг нияти нима эканлигини сўради ва улар бор-йўғи олти ойдан бери учрашаётганини, шунинг учун жиддий нарса ҳақида ўйлашнинг ҳожати йўқлигини айтди. Амални турмушга чиқиш ва оила қуриш ғояси унчалик ҳам қизиқтирмади. Ўша вақтда Амал 35 ёш бўлиб, унинг карьераси билан боғлиқ бошқа режалари бор эди.
Маълум бўлишича, бу вақт давомида Жорж ҳал қилувчи дақиқага тайёргарлик кўрган.
Бир неча ой пухта режалаштиришдан сўнг Жорж Амални кечки овқатга уйига таклиф қилди. У унаштирув узугини Амал шам ёқиш учун ишлатиши керак бўлган зажигалка қўйилган тортмага яширди. Бироздан кейин Жорж Амалдан зажигалкани олишни сўради. У тортмани очди ва узукни кўрди — актёр эса худди ҳақиқий романтик фильмдаги каби тиз чўкди.
Жоржнинг севимли таронаси — Фрэнк Синатра ижросидаги Why shouldn’t янграй бошлаганида Амал ҳаяжонда узукдан кўзини ололмади. «Мен 20 дақиқа давомида тиз чўкиб, унинг розилик беришини кутардим, у эса ҳайратда қолган эди», — деди Клуни.
Ҳашаматли тўй
Амал ва Жорж Клуни 2014 йил сентябрида Венецияда унаштирилди, биринчи учрашувдан бир йил ўтиб, жуфтликнинг никоҳ тўйи ҳашаматли Аман Cанал Гранде меҳмонхонасида бўлиб ўтди. Жуфтликнинг тўйига бир қанча юлдузлар ташриф буюрди — улар орасида Мэтт Деймон, Синди Кроуфорд, Жон Красински ва Эмили Блантлар ҳам бор эди.
Оиланинг жажжи меҳмонлари
Қизиғи шундаки, на Жорж, на Амал бўлажак меросхўрлар ҳақида ўйлаган эди. Аммо кейинроқ улар фикрини ўзгартирди. «Биз фарзандли бўлишни режалаштирмаган эдик. Оила қурганимиздан кейин ҳам сира болалар ҳақида гаплашмаганмиз. Улар бизга керак эмас деб ўйладик. Аммо тўйдан кейин иккаламиз ҳам жуда бахтли эканимизни ҳис қилдик ва бу бахтни яна кимдир билан бўлишишимиз керак эди», — деди Клуни.
Ультратовуш текширувини ўтказган шифокор: «Мана у» — деди. Мен хурсандлигимдан ажойиб, деб жавоб бердим. Кейин эса: «Мана, иккинчиси», — деди. «Нима?» деб юбордим. Биз шифокорлар берган қоғозга тикилиб ўтирдик ва мен бу ерда қандайдир хатолик бор деб ўйладим.
Аммо бу ерда ҳеч қандай хатолик йўқ эди. 2017 йилнинг июнь ойида, муддатидан бир ой олдин Амал Клуни Элла исмли қиз ва Александр исмли ўғилни дунёга келтирди. Болаларнинг туғилиши эр-хотиннинг ҳаётини тубдан ўзгартирди.
Бахтли никоҳ сири
Етти йиллик турмуш давомида Амал ва Жорж Клуни ўртасидаги муносабатлар янада мустаҳкам бўлиб қолмоқда. Улар бир-бирларини севишини ошкора тан олади ва ўзларини жуда романтик тутади — ҳаттоки бир-бирларига севги мактубларини қўлда ёзади. Амал турмуш ўртоғи ҳақида: «У мени ҳайратда қолдирадиган ва табассуми ҳар сафар эритиб юборадиган одамдир», — дейди.
Эр-хотиннинг ота-оналик бурчи бараварига давом этмоқда ва жуфтлик болалар тарбиясини меҳнат билан моҳирона уйғунлаштирди. Жорж ҳамма нарсага аъло даражада сабр қилишни ўрганди ва ҳатто сартарошлик маҳоратини ҳам ўзлаштирди — карантин пайтида у болаларининг сочини олди.
Клунининг айтишича, бўлажак рафиқаси билан учрашишдан олдин унинг ҳаётида жуда кўп бўшлиқлар бўлган. Аммо Амал Жоржнинг ҳаётида пайдо бўлиши ҳамма нарсани ўзгартирди: «52 ёшимда ҳаётимдаги муҳаббатимни топдим ва мен жуда бахтлиман».
Изоҳ (0)