Шавкат Мирзиёев раислигида 28 июнь куни ўтказилган йиғилишда тўқимачилик соҳасида мутахассислар тайёрлаш, илм ва изланиш бўйича Тўқимачилик ва енгил саноат институти ҳамда Ўзбекистон—Корея тўқимачилик технопарки яхлит тизим асосида ишлаши белгиланди. Бу ҳақда Президент матбуот хизмати хабар қилди.
Қайд этилишича, Тошкент тўқимачилик ва енгил саноат институтига Савдо-саноат палатаси раиси Даврон Ваҳобов ректор этиб тайинланган. Институтда янги ўқув йилидан:
- 3 ва 4-курс талабаларини ўқитишда «дуал» таълим тизими жорий қилинади;
- ўқувчилар ҳафтанинг уч кунида институтда назарий дарслар, қолган уч кунида тўқимачилик технопарки ва корхоналарда амалий ўқув машғулотлар асосида ўқитилади;
- нуфузли хорижий тўқимачилик олийгоҳлари билан ҳамкорликда камида 6 та йўналишда талабалар алмашиш дастури йўлга қўйилади.
Эслатиб ўтамиз, Даврон Ваҳобов Савдо-саноат палатаси раиси этиб 25 март куни сайланганди. Бунга қадар у «Ўзтўқимачиликсаноат» уюшмаси раисининг биринчи ўринбосари лавозимида ишлаб келган.
Маълумот учун, Даврон Ваҳобов 1980 йилда Тошкент вилоятида туғилган, маълумоти олий — 2001 йилда Тошкент кимё-технология институтини, 2003 йилда Тошкент иқтисодиёт университетини, 2007 йилда эса Тошкент давлат юридик университетини тамомлаган.
Меҳнат фаолияти давомида Даврон Ваҳобов «Оқсарой Текстил» , «Зарбдор Текстил», «Оқсарой Вортекс», «Остекс Текстил Жиззах», «Сардоба Оқсарой Текстил» каби йирик тўқимачилик лойиҳаларида ишлаган. 2020 йилнинг ноябрида «Ўзтўқимачиликсаноат» уюшмаси раисига биринчи ўринбосар тайинланган эди.
Изоҳ (0)