Россия президенти Владимир Путин Россиянинг валютадаги ташқи қарзи бўйича мажбуриятларни бажаришнинг вақтинчалик тартиби тўғрисидаги фармонни имзолади, деб ёзади Meduza.
Ҳужжатга мувофиқ, давлат еврооблигациялари бўйича мажбуриятлар тўлов куни ички бозордаги курс бўйича рублда тўланганидан кейин бажарилган деб эътироф этилади. Ҳукумат ўн кун ичида давлат облигациялари эгаларига тўловларни амалга ошириш учун жалб қилинадиган банкларни танлаши керак.
Россия давлат қарзига хизмат кўрсатиш билан боғлиқ муаммолар АҚШ, Евроиттифоқ ва бошқа мамлакатлар Украинадаги уруш туфайли санкциялар доирасида Россиянинг халқаро захиралари бир қисмини музлатиб қўйганидан кейин пайдо бўлди.
Апрелда Россия санкцияларга қарамасдан, евробондлар бўйича икки марта тўлов қилди. Бироқ 24 май куни АҚШ Молия вазирлиги Россияга ташқи қарзга хизмат кўрсатиш учун тўловларни долларда амалга ошириш имконини берувчи лицензияни узайтиришдан бош тортди. Бу лицензиясиз Россия Молия вазирлиги мамлакатдаги халқаро облигациялар эгаларига, агар улар долларда номинация қилинган бўлса, тўловларни ўтказа олмайди.
Россия Молия вазирлиги Россия гази учун тўлов схемасига ўхшаш бўлган механизм ёрдамида тўловларни рублда амалга оширишини маълум қилди. Бозорнинг ғарблик иштирокчилари буни тўлов валютасини келишилмаган ҳолда ўзгартириш деб ҳисоблади ва дефолт эълон қилишга тайёрланаётганини маълум қилди. Россия молия вазири Антон Силуановнинг сўзларига кўра, Россияга хавф солаётган техник дефолт «иқтисодиётга ҳеч ҳам таъсир қилмайди», мамлакатда эса давлат қарзи бўйича тўловлар учун валюта ва ресурслар етарли.
Изоҳ (0)