Ўзбекистон милициясидан норозилар учун яшчик, бойлиги сабаб суд қилинган тошкентлик Рабинович, Туркманбошининг текин электр ва газ ҳақидаги эълони. Ўзбек матбуоти 17 июнда нималар ҳақида ёзган?

Тарих — ҳаёт такрорлардан иборат экани ҳақида сабоқ берувчи энг яхши устоз; ҳар кунлик бу сабоқлардан доим ҳам вақтида ва тўғри хулосалар чиқарилмаса-да, тарих барибир беқиёс устозлигича қолаверади.

Ўзбекистон ва жаҳоннинг бундан 90, 60 ва 30 йил аввалги манзарасига ўзбек матбуоти кўзи билан имкон қадар назар солиш ҳам қизиқ, ҳам фойдали кўринди. Ўн йиллар муқаддам айнан бугунги санада нималар бўлган, давр матбуоти улар ҳақида нима деб ёзган, ушбу воқеа-ҳодисаларга жамоатчиликнинг муносабати қандай эди — бари «Кун матбуоти тарихи» рукни материалларида.

90 йил аввал. 1932 йил 17 июнь, жума

Тошкентда Ўзбекистон ҳукуматининг янги биноси фойдаланишга топширилган, лекин шу ҳақидаги материалда ҳам танқидга ўрин топилганига фақат қойил қолиш мумкин.

Қисқа сатрларда берилган бир эътиборга молик хабар: «1 июлгача Ўзбекистон милициясининг барча бўлимларида милиция ходимларининг қонунга хилоф ҳаракати юзасидан шикоятлар учун яшчиклар қўйилади. Милиция идораси қошида махсус шикоят бюроси тузилади. Шикоятлар энг қисқа муддатда текширилади».

Дунёда нима гап? Таниқли британиялик ёзувчи Бернард Шоу СССРни туҳматчилардан ҳимоя қилмоқда:

60 йил аввал. 1962 йил 17 июнь, якшанба

Бир муддат аввал СССР етакчиси Никита Хрушчёв мамлакат Конституциясини янгилаш вақти келгани ҳақида маъруза ўқиганди. Шу муносабат билан Конституция комиссия ташкил этилган. 15 июнь куни эса комиссия мажлиси бўлиб ўтган:

«Антуан Гизенгадан қўлингни торт!» сарлавҳали хабардан иқтибос: «‘Империалистлар ва уларга ёлланган кишиларнинг ўзбошимчалигига чек қўйиш керак! Антуан Гизенга озод қилиниши керак!’. Тошкент абразив заводи партия комитети секретари Исаевнинг шу сўзларини неча юзлаб ишчилар гулдурос қарсаклар билан кутиб олдилар».

Дарвоқе, Американинг иғвогарона хатти-ҳаракатлари, атмосферада атом бомбаларини портлатиши ёмон, жуда ёмон. Лекин жаз мусиқасига гап йўқ. Шунинг учун ҳам Америка жаз -оркестри совет Ўзбекистонининг пойтахти Тошкентда концерт беришига ҳайрон қолмаслик керак.

Бой бўлиш айб ҳисобланган замондан яна бир қизиқ материал: Тошкентнинг Куйбишев (ҳозирги Мирзо Улуғбек) туман халқ суди Михаил Рабиновични ҳар хил йўллар билан бойлик орттириш, ҳаромхўрлик, текинхўрлик қилиб келганини аниқлаб, уни беш йилга бадарға қилиш ва мол-мулкини давлат фойдасига мусодара этишга ҳукм қилган.

30 йил аввал. 1992 йил 17 июнь, чоршанба

Ўзбекистон президенти Ислом Каримов Жануби-Шарқий Осиё мамлакатлари бўйлаб турне бошлаган. Биринчи манзил — Жанубий Корея (қуйида шу ташриф бошлангани ҳақида хабар). Кейинги манзиллар — Малайзия ва Индонезия.

Баҳор бошида бутун Ўзбекистонни ҳаяжонда ушлаб турган Намангандаги Мингбулоқ нефть конидан энг ҳаяжонли хабарлар келмаяпти. «Қудуқдан нефть чиқиши тўхтагани йўқ, анча камайди, холос», — деб вазиятни тушунтиряпти кондаги масъуллардан бири.

Ўзбекистон мудофаа ишлари вазири Рустам Аҳмедов МДҲ ҳарбий олий ўқув юртларида таълим олаётган ўзбекистонлик талабаларга мурожаат қилган:

Наманган вилоятининг Янгиқўрғон, Чортоқ ва Косонсой туманларида дўл аралаш жала қуйиб, бўрон кўтарилган, оқибатда сув тошқинлари келиб чиққан. «Ўзбекистон овози»нинг ЎзАга асосланиб ёзишича, ҳодиса оқибатида 3 та кўприк бузилган, «Халқ сўзи» газетаси эса 4 та кўприк бузилгани ҳақида ёзган.

Дунёда нима гап? Туркманистон президенти Сапармурод Ниёзов шу йил октябрь ойидан эътиборан аҳоли учун электр энергия, газ ва сув бепул бўлишини эълон қилган.

Ушбу материал ҳуқуқлари муаллифларида сақланган ҳолда эълон қилиш шарти билан «Дарё» интернет-нашрига тақдим этилди