Сўнгги кунларда Ўзбекистонда шакар нархи сезиларли даражада кўтарилди. Бу бозорларда, турли савдо нуқталарида ушбу маҳсулотга узундан-узун навбатлар ҳосил бўлишига олиб келди. «Янги Ўзбекистон» нашри ушбу саволга республикадаги йирик шакар ишлаб чиқарувчи субъектлар бири — «Ангрен шакар» масъулияти чекланган жамиятига уюштирилган пресс-тур давомида жавоб олишга ҳаракат қилди.
«Бу бизга боғлиқ бўлмаган ҳолат. Яъни шакар нархининг ўсишига, биринчи навбатда, мазкур маҳсулот ва унинг хом ашёсини Марказий Осиё минтақасига етказиб бериш бўйича транспорт ва логистика билан боғлиқ муаммолар таъсир кўрсатди. Айни пайтда мазкур масалалар ҳал этилган», — дейди жамият бош директори Рустам Акбархўжаев.
Таъкидланишича, ҳозирги пайтда аҳолининг шакарга бўлган талабини янада қондириш мақсадида «Ангрен шакар» МЧЖ бир суткада 1,1 минг тонна шакар ишлаб чиқаряпти. Аслида корхона йилига 300 минг тонна шакар ишлаб чиқариш қувватига эга. Корхона ортиқча қувват билан ишлаётгани боис, ҳар ойда 30 минг тоннадан ортиқ шакар ишлаб чиқармоқда. Бу йилига 360 минг тонна дегани.
«Яъни корхона ўз қувватидан ҳам юқори ҳолатда ишлаяпти. Демакки, аҳолининг ортиқча хавотир олишига асос йўқ. ‘Ангрен шакар’ корхонаси ортиқча имкониятларни ишга солган ҳолда, аҳолини узлуксиз шакар маҳсулоти билан таъминлаяпти. Бунинг учун омборларда хом ашё ва тайёр шакар аҳолига етарли даражада», — дейилади хабарда.
Аввалроқ 10—14 июнда Ўзбекистон республика товар-хом ашё биржасида ўтказилган очиқ биржа савдолари натижаларига кўра, шакарнинг барча категорияси бўйича шаклланган ўртача кунлик нархи маҳсулотнинг бир тоннаси учун 14 миллион 554,5 минг сўмдан 10 миллион 754,9 минг сўмгача, яъни 26,1 фоизга пасайганди.
Изоҳ (0)