Метро — жамоат транспорти орасида тезкор ва қулайлиги билан ажралиб туради. Шунданми, дунёнинг кўплаб мамлакатларида оммалашиб улгурган. «Дарё» Тошкент метрополитени ва ундаги шароитлар билан таништирган эди. Марказий Осиёда Тошкент метрополитенидан кейин иккинчи бўлиб қурилган Олма-ота метрополитени ҳақида биласизми?

Қозоғистоннинг Олма-ота метроси Олма-отадаги юқори тезликда ҳаракатланувчи темир йўл транспорти ҳисобланади. 2011 йилнинг декабрь ойида очилган метро салкам 12 йилдан буён йўловчиларга хизмат кўрсатиб келмоқда. «Дарё» мухбири Севара Мирзараҳимова Олма-отада бўлиб, шаҳар метросидан фоторепортаж тайёрлади.

Метро ўз фаолиятини эрталаб соат 06:20 дан бошлаб, кечки 00:00 да якунлайди. Бир қарашда Олма-ота метроси ўзимизнинг метрога ўхшаш. Аммо йўловчилар сони камроқ. Эҳтимол, шу сабаб бекатлар ичида тирбандликлар йўқдир. Метро бекатига кираверишда маълумот тахтачаси Тошкент метрополитенидан фарқли равишда, 3 та тилда — қозоқ, рус ва инглиз тилларида берилган.

Олма-ота метросининг узунлиги 13,4 километрни ташкил этиб, 9 та ва 2022 йилнинг 30 май санасидан 2 та янги бекат очилиб, ҳозирда 11 та бекат мавжуд. Кунига ўртача 45 минг йўловчини манзилига етказиб қўйиш имкониятига эга метрога киргач, чипта сотадиган автомат, банкомат ва посилкаларни етказиб бериш учун автоматлаштирилган терминал ҳамда ичимликлар сотадиган автомат дўконни кўриш мумкин.

Метрода имконияти чекланган инсонлар учун яратилган шароитлар эътиборни тортиши аниқ. Чунки ҳар қадамда ногиронлиги мавжуд инсонлар учун пандуслар, тактил йўлаклар бор.

Бекатнинг кириш қисмида назорат пунктлари мавжуд. Қуйидаги расмда метро ходимлари назорат постида метрога кираётган йўловчининг юкини текширмоқда.

Олма-ота метросининг бир марталик йўл ҳақи 80 қозоқ тенгеси (ўзбек сўмида сал кам 2 минг)ни ташкил қилади. 7 ёшдан 15 ёшгача бўлган болалар учун 40 тенге (минг сўм). Жетоннинг амал қилиш муддати сотиб олинган вақтдан бошлаб 1 сутка. Муддати ўтган жетонларни ҳафтанинг ҳар чоршанба куни «Жетон куни» акциясида ишлатиш мумкин. Бундан ташқари, қайта фойдаланишга мўлжалланган смарт карталар ёки шу каби банк ва транспорт карталари орқали ҳам тўловни амалга ошириш мумкин.

Назорат пунктидан ўтдингиз ва кассадан жетон олиб, турникетдан ўтасиз. Кейин узун эскалаторлар сизни кутиб олади.

Бу ерда ҳали ҳам антисептик воситалардан фойдаланиш мумкин.

Метронинг «Бойқўнғир» бекати. Бекат замонавий high-tech усулида таъмирланган бўлиб, номи Бойқўнғир  космодроми номидан олинган. Деворлари кўк ва оч кул ранг металл панеллар билан қопланган ҳамда кўзи ожиз инсонлар учун тактил плитка чизиқлар бор.

Ҳар бир бекатда метро йўналиши ва бекатлари ҳақида маълумот тахталари мавжуд. Лекин унчалик ҳам тушунарли эмас. Балки метронинг ўзи катта эмаслиги сабабдир.

«Жибек жўли» бекати. Ипак йўли маъносини англатувчи бекатни Тошкентнинг Амир Темур метро бекатига ўхшатиш мумкин. Ушбу бекатдан чиқиш билан Сквер (Square broadway) каби ёшларга тўла кўчадан чиқасиз.

Тошкент метросида поезд жўнаб кетган вақтини кўрсатиб турувчи экран бўлса, Қозоғистон метро бекатларидаги экранлар поезднинг келиш вақтини кўрсатади.

Шунингдек, бекатларда йўловчиларни огоҳлантирувчи белгиларни ҳам учратиш мумкин.

Платформанинг четида ҳам кўзи ожиз инсонлар учун махсус бўртиб чиққан 3 қатор чизиқ тортилган.

Бекатга ролик ва велосипедда кириш мумкин эмас, деган белги. Бундан ташқари, чекиш ҳамда қулоқчиндан ҳам фойдаланиш мумкин эмаслиги кўрсатилган.

Метродан чиқишдаги турникет. Нафақат бекатга киришда, балки чиқишда ҳам турникетлардан ўтилади. Ягона фарқи чиқишдаги турникетлар мутлақо бепул.

Тактик йўлаклар метрога киришдан то чиқишгача бор.