U-23 Осиё Кубоги—2022 ярим финалида Ўзбекистон терма жамоаси Японияни мағлубиятга учратди. «Бунёдкор» стадионида ўтган ўйинда Темур Кападзе шогирдлари 2:0 ҳисобидаги ғалабани қўлга киритди.
Ўйиндан кейин япониялик футболчилар ўзлари фойдаланган кийиниш хонасини тозалаб кетди.
«Японияликлар жаҳон футболига экспорт қилган энг яхши фазилатлардан бири бу сўзсиз фаросатдир», — дейди сурат остида қолдирган ПФЛ бош директори Диёр Имомхўжаев.
Қайд этиш керак, бу япониялик футболчилар ва кун чиқар юрт мухлисларининг «ташриф қоғози»га айланиб улгурган одат. 2018 йилги Жаҳон Чемпионатида нафақат япониялик футболчилар, балки ишқибозлар ҳам ҳар бир ўйиндан кейин трибуналарни ахлатлардан тозалаб кетганди.
Сўнгги вақтларда Ўзбекистон терма жамоалари ва клублари ҳам меҳмондаги ўйинлар вақтида кийиниш хонасини тоза ҳолга келтирган ҳолда, мезбон жамоага миннатдорчилик билдириб кетишни одат тусига айлантирди.
Эслатиб ўтамиз, Ўзбекистон ва Япония U-23 терма жамоалари ўртасидаги ўйин ўзбекистонлик томошабинларсиз ўтказилди. Ўзбекистоннинг чорак финал доирасидаги Ироққа қарши ўйинида томошабинлар томонида майдонга турли қаттиқ жисмлар улоқтирилгани оқибатида ОФК мезбонларнинг ярим финалдаги ўйинини маҳаллий томошабинларсиз ўтказиш қарорини қабул қилган ва ЎФАни 50 минг доллар миқдорида жаримага тортганди.
Изоҳ (0)