24 июнь куни Ер аҳолиси ноёб ҳодиса — Сайёралар парадини кузатиши мумкин бўлади. Меркурий, Венера, Марс, Юпитер ва Сатурн — айнан шу тартибда — осмонда бир сафга тизилади. Сайёралар парадини оддий кўз билан кўриш мумкин бўлади, деб хабар бермоқда Star Walk.
Астрономлар таъкидлашича, бу йилги Сайёралар паради энг томошабоп бўлиши кутилмоқда. Аслида бу ҳодисада бешта эмас, нақ еттита сайёра қатнашади — Нептун ва Уран ҳам самовий парадга қўшилади. Аммо ушбу икки сайёра узоқда жойлашгани ва хира бўлгани учун оддий кўзга кўринмайди.
Кузатувни тонг отишига бир соат қолганида бошлаш мумкин. Сайёралар Шарқдан Жанубга қараб бир-биридан узоқда жойлашади (жанубий кенгликларда Шимолдан Шарққа қараб). Жанубий ярим шардагилар устунликка эга бўлади — улар учун сайёралар уфқдан эртароқ кўтарилади ва анча баландроқда жойлашади.
Венара ва Марс ўртасида жойлашадиган ярим ой қўшимча бонусга айланади. Ой июнь охирига қадар сайёралар оралиғидаги ўрнини бирма-бир ўзгартириб бораверади.
Осмонда сайёраларни осонлик билан топиб олиш учун Star Walk 2 ёки Sky Tonight каби астрономик иловалардан фойдаланиш мумкин. Уларни телефонга ўрнатиб, мобил қурилмангизни осмонга қаратинг, шунда илова кўриниб турган объектлар номларини кўрсатади.
Сайёралар паради деган илмий атаманинг ўзи йўқ, аммо Қуёш тизимидаги сайёралар Ердан қараб турган одамга нисбатан осмоннинг битта қисмида бир чизиқда саф тортиши ҳодисасини аташда астрономияда кенг қўлланилади.
Қайд этилишича, охирги марта сайёраларнинг тўлиқ паради 2020 йил 4 июлда кузатилган. Навбатдаги катта парад эса 2040 йил 8 сентябрга тўғри келади, деб маълумот бермоқда NASA.
Изоҳ (0)