«Ўзбекистонда масс-медиани ривожлантиришнинг долзарб масалалари» мавзусида 14 июнь куни давра суҳбати бўлиб ўтди. Унда Олий Мажлиси Сенати, Қонунчилик палатаси вакиллари, бир қатор мутасадди давлат органлари масъуллари ҳамда халқаро ва нодавлат ташкилот раҳбарлари, хорижий ва маҳаллий ОАВ вакиллари иштирок этди. Бу ҳақда «Дарё» мухбири хабар бермоқда.
Тадбирда журналистларнинг ҳуқуқини, шунингдек, уларни турли тазйиқ ва зўравонликлардан ҳимоя қилиш, ахборот олиш ва тарқатишда холисликни таъминлаш, ОАВ ходимлари ҳуқуқий саводхонлигини ошириш, турли фейк хабарлар тарқалишини олдини олиш, журналистик фаолиятда гендер тенглик масалалари ёритилиши ва соҳадаги бошқа долзарб масалалар юзасидан фикр-мулоҳазалар билдирилди.
Давра суҳбатида АОКА раҳбари Асаджон Хўжаев нутқ сўзларкан, давлат органлари фаолиятида очиқликни таъминлаш, танқидлар ва жамоатчилик фикрига ўз вақтида асосли муносабат билдириш йўналишидаги ишлар ҳақида маълумот берди.
Унинг қайд этишича, 2019 йилда танқидий-таҳлилий материалларга жавоб бериш 12 фоизни ташкил этган бўлса, бу кўрсаткич 2021 йилда 93 фоизга етган. У агентлик фаолияти доирасида ташкил этилган «Диалог майдончаси», 1213 қисқа рақамли Call-марказ, Media-advice платформалари орқали нафақат соҳа вакиллари, балки аҳоли ҳам ўзларини қизиқтирган барча масалалар бўйича ҳуқуқий жавоблар, маслаҳатлар ва тавсиялар олиш имконига эгалигини ҳам таъкидлади.
«Агентлик бу ишлар билан чекланиб қолмайди, тегишли идоралар ва ташкилотлар билан ҳамкорликда сўз эркинлигини таъминлаш борасидаги изчил ислоҳотларни янада такомиллаштириш, давлат органлари очиқлигини кенгайтириш, журналистлар ва матбуот котибларининг малакасини ошириш, ахборот хизматларини фаолиятини яхшилаш ва ОАВ билан узвий алоқаларини таъминлашдаги саъй-ҳаракатларини давом эттиради», — деди Асаджон Хўжаев.
Тадбир давомида АОКА вакили миллий ахборот қонунчилигини такомиллаштириш ва унификациялаш масалалари, ахборот кодексини ишлаб чиқиш зарурати ҳақида ҳам гапирди. Хусусан, ОАВни давлат рўйхатидан ўтказиш тартиби, ОАВ маҳсулотини тарқатиш, раддия бериш ва жавоб қайтариш ҳуқуқи ва шу каби бугунга қадар қонунчиликда аниқлик киритилмаган қатор тушунчаларга изоҳ берилаётганини таъкидлаб ўтди.
Изоҳ (0)