Google компанияси дастурий таъминот бўйича муҳандис Блейк Леймон сунъий интеллектли чат-ботнинг онги борлигини айтганидан сўнг, уни таътилга чиқариб юборди. Раҳбарият унинг ғоясини тан олмаган, Леймон эса ўз тарихини The Washington Post’га сўзлаб беришга қарор қилган.
41 ёшли муҳандиснинг ҳисоблашича, LaMDA (Language Модель фор Dialogue Applications) диалог дастури учун мўлжалланган тил нейротармоғида онг аломатлари мавжуд. Google’нинг ушбу чат-боти тармоқдаги триллионлаб сўзларни таҳлил қилган ҳолда нутқни имитация қила олади.
Леймон LaMDA билан ишлашни кузда, тизимнинг нафратни уйғотишга сабаб бўладиган жумла ва иборалардан фойдаланишини текшириш мақсадида бошлаган. «Агарда ўзимиз ёзган компьютер дастури билан ишлаётганимни билмаганимда, мен физикадан хабари бор 7-8 ёшли бола билан гаплашяпман деб ўйлаган бўлардим», — дейди дастурчи.
Натижада у нейротармоқ ўз онгига эга деган хулосага келган — динга боғлиқ суҳбатларнинг бирида чат-бот ўзининг «шахси» ва «ҳуқуқлари» ҳақида гапирган. LaMDA билан навбатдаги суҳбатлар Леймоннинг гипотезасини тасдиқлаган. Medium’да муҳандис нейротармоқ билан суҳбатидан парча келтирган.
Леймон — сунъий интеллектнинг онги бор деб ҳисоблайдиган ягона дастурчи эмас. У ҳамкасби билан раҳбариятга «LaMDA онглими?» деган ҳисоботни киритган, бироқ Google уларнинг далилларини ишончсиз деб топган.
Дастурчи, шунингдек, LaMDA’нинг манфаатларини ҳимоя қилиш мақсадида АҚШ Конгресси Вакиллар палатасининг юридик қўмитаси вакиллари билан ҳам боғланган. Леймон махфийлик сиёсатини бузгани сабаб таътилга юборилган.
Эслатиб ўтамиз, 2020 йилда канадалик дастурчи ҳаёт мазмуни ҳақида суҳбатлашса бўладиган сунъий интеллект яратганди.
Изоҳ (0)