Ёзда, инсон организми йилнинг ҳар қандай вақтидан кўра кўпроқ ичимлик сувига муҳтож, унинг етишмаслиги ноқулайлик ва сувсизланишга олиб келиши мумкин. Тўғри, оддий сув чанқоқни тезда қондиради ва ёзги жазирамада танани жонлантиради. Marie Claire нашри йилнинг энг иссиқ вақти учун яна бир қанча ичимликлар рўйхатини тақдим этди.
Чой
Чанқоқни бостирувчилар рўйхатида энг кутилмагани — бу иссиқ чой, у совуқ кунларда исинишга ёрдам беради, деган қараш бор. Бироқ иссиқ ҳавода иссиқ ичимликлар организмни кўпроқ терлатади ва керакли совутиш эффектига эришади.
Чойнинг 1500 дан ортиқ турли навлари мавжуд: қора, оқ, яшил, улун, пуэр, гибискус ва бошқалар. Шуни унутмаслик керакки, иссиқ ва совуқ ҳолда ичиш мумкин бўлган турли хил ўсимлик чойлари мавжуд. Масалан, ялпиз ёки шалфей нафақат совутувчи таъсирга эга, балки табиий доривор сифатида организмга катта фойда келтиради. Малина ёки смородина барглари иммунитетни сақлаш учун витаминлар ва элементларнинг ҳақиқий омбори ҳисобланади.
Квас
Квас ҳам доривор хусусиятларга эга — у исиб кетишни енгиллаштиради ва жиддий касалликдан кейин организмни тиклашга ёрдам беради.
Морс ва шарбатлар
Уй шароитида тайёрланадиган ушбу ичимликлар дўконлардагидан фарқли ўлароқ, консервант, қўшимча ва бўёқлардан холи. Шунинг учун улар соғлиққа эътибор қаратадиган одамлар учун доимо салқинлатувчи вариант бўлиб қолади.
Сутли ичимликлар
Марказий Осиё мамлакатларида жазирама пайтида қимиз, айрон ёки оддий совутилган кефир каби ичимликлар кўпроқ истеъмол қилинади. Улар чидаб бўлмас иссиқ кунларда чанқоқни қондириш учун ажойиб танлов. Эътибор беринг, бугунги кунда деярли ҳар бир соғлом озиқ-овқат дўконининг жавонларида кўплаб турдаги суюқ ферментланган сут маҳсулотларини топиш мумкин.
Кокос суви
Илгари ушбу маҳсулотга талаб унчалик юқори эмасди, чунки кокос сувини сақлаш ва уни қадоқлаш технологияси билан боғлиқ муаммолар ҳал этилмаганди, аммо бугунги кунда ишлаб чиқариш ҳеч қандай қийинчиликка дуч келмаяпти. Йилнинг айнан иссиқ кунларида кокос сувига бўлган талаб мисли кўрилмаган даражада ошмоқда, ушбу салқин ичимлик паст шакар миқдори ва ёқимли таъми туфайли чанқоқни қондиради.
Шуни унутмангки, чанқоқни қондиришнинг қандай муқобил вариантларига мурожаат қилишдан қатъи назар, энг яхшиси бу ҳаёт ва энергиянинг асосий манбаи бўлган сувдир. У организмни турли хил ташқи таъсирлардан ҳимоя қилади, тана ҳароратини тартибга солади, озуқавий моддаларини ўзлаштиришга ёрдам беради ва метаболизмда фаол иштирок этади.
Изоҳ (0)