«Манчестер Юнайтед» ҳужумчиси Криштиану Роналду собиқ модель Кетрин Майоргага 56 миллион фунт компенсация тўламайдиган бўлди.
The Associated Press хабарига кўра, округ судьяси Женнифер Дорси жума куни Лас-Вегасда бўлиб ўтган йиғилишда Майорганинг адвокати Лесли Марк Стоваллнинг жараён давомида «ўғирланган» махфий ҳужжатлардан фойдаланган ноҳақ хатти-ҳаракати сабаб даъвони рад этди.
Судья ишни қайта даъво қилиш имкониятисиз бутунлай тўхтатишни буюрди.
Майорга томон бу қарор устидан Сан-Франциско округи апелляция судига шикоят қилиш ҳуқуқига эга.
Ушбу жараён 2018 йил сентябрь ойида бошланган эди. Аёл 2009 йили Лас-Вегасда футболчи томонидан зўравонликка учрагани ҳақида маълум қилганди. Модель 2010 йилда Роналду вакиллари билан келишувга эришган ва 375 минг доллар эвазига ушбу маълумотларни ҳеч кимга ошкор қилмаслик бўйича шартнома имзолаган. Кейинчалик португалиялик пул ўтказганини тан олган. 2020 йил октябрь ойида модель яна бир бор Роналду билан судлашишга ҳаракат қилди. У 2010 йилда тузилган ошкор этмаслик тўғрисидаги шартнома шартларини қабул қилаётганда руҳий ҳолати одатий бўлмаганини исботлашга уринди.
Изоҳ (0)