Ўзбекистонда давлат бошқарувининг парламентар республика тизимига ўтиш вақти ҳали келмаган. Бу ҳақда Конституциявий комиссиянинг навбатдаги йиғилишида Олий Мажлис қонунчилик палатаси спикери ўринбосари Акмал Саидов айтиб ўтди, дея хабар бермоқда «Дарё» мухбири.
Акмал Саидовнинг таъкидлашича, ҳозир давлат бошқарувини парламентар республикага ўтказиш вақти эмас.
«Конституцияни ислоҳ қилиш борасида аҳолидан келаётган таклифлардан бири – парламентар республикага ўтиш масаласида бўлмоқда. Биласизлар, давлат бошқарувининг президентлик бошқаруви бор. Бунга Америка Қўшма Штатлари яққол мисол бўла олади. Парламентар республика бор. Бу бошқарув тизимида энг кўзга кўринган давлатлар Германия федератив республикаси ва Италия. Ва ярим президентлик бошқарув тизими ҳам мавжуд. Бунга кўпроқ Франция тўғри келади. Чунки у ерда ҳам президент, ҳам ҳукумат бор.
Бизда ҳам парламент республика қилиш масаласида таклифлар билдирилмоқда. Аммо у таклифлар аниқ эмас. Яъни айтилаётган тизим қандай бўлиши кераклиги аниқ келтирилмаган. Германия федератив республикаси парламентар республика. У ерда президент бор, лекин асосий вазифа канцлерда. Ёки Италияда ҳам президент бор, лекин у ерда асосий шахс бош вазир ҳисобланади. Мен ўйлаяпманки, ҳозирги кунда давлат бошлиғининг ўзи парламент ролини кучайтириши дунёда йўқ. Менимча, парламентар республикага ўтишга бизларга ҳали эрта. Бу керак ҳам эмас», – деди спикер ўринбосари.
Аввалроқ Акмал Саидов аҳолининг жабрланган тоифаси ўлим жазосини тиклаш тарафдори эканини айтиб, конституциянинг 24-моддасига «Ўзбекистонда ўлим жазоси тақиқланади», деган жумлани қўшиш таклифини билдирганди.
Изоҳ (0)