Фарғона вилояти Марғилон шаҳрида қалбаки пулга «ЗИЛ» олмоқчи бўлган шахс қўлга олинди. Бу ҳақда вилоят Ички ишлар бошқармаси хабар қилди.
Қайд этилишича, Марғилон шаҳри Қўштепа тумани Обод кўчасида яшовчи Х.Х. «ЗИЛ-130» юк машинасини сотмоқчи бўлган. Туманнинг «Халқобод» маҳалласида яшовчи Р.Ғ. унинг ишончига кириб, автомашинасини 10 минг долларга сотишга ёрдам беришини ва харидор топганини айтган.
Унга харидордан олган 10 минг долларни берган вақтида пуллар қалбаки экани аниқланган.
Ҳолат юзасидан Жиноят кодексининг 168-моддаси 3-қисми «а» банди (кўп миқдорда фирибгарлик) билан жиноят иши қўзғатилган. Ҳозирда тергов ҳаракатлари олиб борилмоқда.
Юқорида кўрсатилган жиноятни содир этган шахс ўн йилгача озодликдан маҳрум қилиш билан жазоланиши мумкин.
Аввалроқ Тошкентда қалбаки 6900 долларни сотмоқчи бўлган уч киши қўлга олингани, Андижонда қалбаки пул тайёрлаш билан шуғулланиб келган жиноий гуруҳ ушлангани, Фарғонада 100 минг сўмлик қалбаки купюрага дорихонадан дори сотиб олган аёл қўлга тушгани ҳақида хабар берилган.
Мавзуга доир:
Изоҳ (0)