Ўзбекистонда ҳайдовчининг ёнидаги йўловчи хавфсизлик камарини тақмагани учун қўлланиладиган жарималар ижтимоий тармоқларда каттагина баҳс ва мунозараларга сабаб бўлмоқда. Тошкент шаҳар ЙҲХБ ахборот хизмати катта мутахассиси Шодмон Сафаровнинг сўзларига кўра, хавфсизлик камарини тақмаган йўловчига жарима белгиланмаган.
«Вазирлар Маҳкамасининг 2022 йил 12 апрелдаги 172-сонли қарори билан тасдиқланган янги таҳрирдаги Йўл ҳаракати қоидалари 1 май кунидан бошлаб кучга кирди. Ушбу қоидаларнинг 9-бандига кўра, конструкциясида хавфсизлик камари назарда тутилган транспорт воситасини бошқараётган ҳайдовчи ва олд ўриндиғидаги йўловчи хавфсизлик камарини тақиши шартлиги белгилаб берилган эди. Хавфсизлик камарини тақмаган ҳайдовчига нисбатан амалдаги маъмурий жавобгарлик тўғрисидаги кодекснинг 125-моддаси 1-қисмига кўра, БҲМнинг ярим баробари миқдорида (150 минг сўм) жарима назарда тутилган.
Хавфсизлик камарини тақмаган йўловчи бўйича қонунчиликка таклифлар киритилган, кўриб чиқилмоқда. Айни вақтда хавфсизлик камарини тақмаган йўловчига нисбатан жарима қўлланилмайди», — дейди мутахассис.
Аввалроқ Ўзбекистонда янги таҳрирдаги Йўл ҳаракати қоидалари тасдиқлангани тўғрисида хабар берилганди. Унга кўра, ЙПХ ходимидан дислокацияни сўраш талаби бекор қилинган, Ўзбекистонда автомобилларга турли ёзувлар ва қўлбола стикерларни илиш тақиқланган.
Изоҳ (0)