UFC машҳурлик ва оммабоплик борасида жадал ривожланиб бормоқда, томоша қилинишлар сони бўйича ҳам бокс билан бемалол рақобат қила олади, баъзида ошиб кетиши ҳам ҳеч гап эмас. Аммо бу даражага промоушеннинг асосий харизматик жангчиси — Конор Макгрегорсиз етиб бўлмасди. Ташкилот тарихидаги энг кассабоп жанглар айнан ирландиялик номи билан боғлиқ. Шу сабабли президент Дэйна Уайт ҳам унинг ҳар қандай инжиқликларини кўтаради, бунга мисол тариқасида Конорнинг ҳеч қачон тугамайдиган жанжаллари ва фаолиятини якунлаш ҳақидаги серияли баёнотларини келтириш мумкин.
5. Эдди Альварес — Конор Макгрегор
Мазкур тўқнашув даромаддан ташқари, тарихий аҳамиятга эгалиги билан ҳам муҳим эди. Бу икки хил тоифасидаги икки чемпион ўртасида кечган биринчи жанг эди. Гарчи афишада Макгрегор – Альварес эмас, Альварес – Макгрегор деб ёзилган бўлса-да, музокаралар столида ирландиялик етакчилик қилади. Жанг натижаси қандай бўлишидан қатъи назар, Конор 3 миллион доллар, енгил вазн тоифаси чемпиони эса атиги 500 минг доллар оларди. Ҳомий Reebok ҳар бир жангчига қўшимча яна 40 минг доллар олиб келарди. Конор, шунингдек, Эддини иккинчи раундда нокаутга учратиб, кечанинг энг яхши жангчиси бўлгани учун қўшимча 50 минг долларга эга чиқади.
Бундан ташқари, кеча рекорд даражадаги рақамлар билан ҳам ёдда қолди. UFC 205 чипталар сотувида энг кўп даромад кўради — 17,7 миллион доллар, бу аввалги UFC 129 га қараганда 5,7 миллион долларга кўпроқ эди. Шу билан бирга UFC 205 афсонавий Madison Square Garden тарихидаги касса рекордини янгилайди, ҳатто Леннокс Льюис ва Эвандер Ҳолифилд (13,5 миллион доллар) ўртасидаги бокс жангини ҳам ортда қолдиради.
PPV’да (пулли трансляциялар тизими) Конор ва Эдди ўртасидаги қўшма жанг 1,3 миллионта томошабин йиғади — PPV тарихида 11-ўрин. Океан ортида пулли трансляция, тахминан, 60—70 долларни ташкил қилади.
Умуман олганда, кассадан ташқари, UFC 205, тахминан, 78 миллион доллар даромад кўради, шундан камида 10 миллион доллари ирландияликнинг қўлига тегади. Шу тариқа Конор бир оқшомда 13 миллион доллардан кўпроқ ишлаб топган, Эддининг даромади эса 1 миллион доллардан ошмайди.4. Конор Макгрегор — Дональд Серроне
Бу Конор учун Ҳабиб Нурмагомедовга ютқазганидан кейинги илк жанг бўлади. UFC фахрийси Дональд «Ковбой» Серронега қарши камбэк 1 353 429 томошабин йиғади. Ҳабибга учралган мағлубиятга қарамай, Конор ҳомийлик ва PPV’дан 3 миллион доллар олиш ҳуқуқига эга эди. Серроне эса шартномада кўрсатилган 200 минг доллардан ташқари, ирландиялик устидан ғалаба қозонган тақдирдагина тўловни икки баравар ошириши мумкин эди, чунки у PPV’дан тушган даромаддан улуш талаб қилмаган. Шу тариқа Конор 40 сония ичида шартнома тўловлари ва PPV улушидан, тахминан, 15 миллион доллар ишлаб олади.
Агар ҳомийлик шартномалари ҳисобга олинса, бу миқдор беш бараварга ошади. Конор турли ҳомийлардан жами 80 миллион долларга умид қилган, бир йиллик танаффус ва Нурмагомедовдан қабул қилиб олинган мағлубиятдан кейин ёмон натижа эмас.3. Нейт Диас — Конор Макгрегор 2
UFC тарихидаги энг ажойиб ва орзиқиб кутилган жанглардан бири катта тўловларсиз ўтиши мумкин эмас эди. 2016 йилдаги сенсациялардан кейин Диаснинг котировкалари ошади ва у гонорар бўйича Конор билан деярли тенглашиб олади. Агар биринчи жанг учун Нейт бор-йўғи 620 минг доллар билан кифояланган бўлса, реванш жанги учун 20 баравар кўпроқ олади.
Жангдан олдин Диасга 2 миллион доллар кафолатланганди. Reebok билан ҳомийлик шартномаси унга яна 250 минг доллар олиб келади. Кечада жанг қилгани учун яна 50 минг доллар қўшимча бонус. Ва энг муҳими, айнан шунинг учун ҳамма Конор билан жанг қилишни хоҳлайди — PPV орқали тушадиган улуш. 5 ойдан кейин ўтказилган уларнинг реванши биринчи жангга қараганда деярли 300 минг кўпроқ томошабин тўплайди. Тўқнашув ҳаммаси бўлиб 1,6 миллион марта кўрилади. Бу UFC тарихидаги энг кўп томоша қилинган иккинчи жанг ҳисобланади. Диас яна 10,5 миллион долларга эга чиқади. Ва охирги бонус: 150 минг доллар — Лас-Вегасдаги афтепати (асосий кечадан кейинги тадбир) учун. Умумий ҳисобда Нейт, тахминан, 13 миллион доллар ишлаб олади.
Конорда эса янада каттароқ сумма. 3 миллион долларлик кафолатланган шартнома, Reebok’дан 250 минг доллар, кечада қатнашгани учун 50 минг доллар, пулли трансляциядан 11,5 миллион доллар ва Лас-Вегасдаги афтепати учун 250 минг доллар. Жами — 15 миллион доллар.
2. Конор Макгрегор — Дастин Порье 2
Ҳабиб Нурмагомедовдан учралган мағлубиятдан сўнг Конор биринчи раунднинг 40 сониясида Дональд «Ковбой» Серроненинг бурнини ерга ишқалайди. Энг қизиғи Порье ҳам Ҳабибга ютқазганидан кейин битта ғалабага эришганди — Ден Ҳукер устидан очколар эвазига ғалаба қозониб, репутациясини тиклаб олади. Бир жангчидан учралган мағлубиятга қарамай улар PPV’ни ҳисобга олмаган ҳолда ҳам яхшигина даромад эга чиқади. Конор рекорд даражадаги 5 миллион долларга эга чиқади, одатда у максимум 3 миллион доллар оларди. Дастинда эса бу кўрсаткич 1 миллион долларни ташкил қилади.
Америкалик жангчи Макгрегорни иккинчи раундда нокаутга учратганига қарамай, у фақат кечада қатнашгани учун бонуслар (50 минг доллар) ва Reebok ҳомийлигидан (50 минг доллар) пул олади, холос. Ирландиялик эса 15—20 миллион долларга эга чиқади, чунки пуллик кўришлар сони 1,6 миллионни ташкил этади, бу пулга чақилса, камида 100 миллион доллар деганидир.
1. Ҳабиб Нурмагомедов — Конор Макгрегор
UFC тарихидаги энг шов-шувли ва жанжалларга бой бўлган жанг. PPV’га кўра бу жанг MMA бўйича энг кўп кўрилган жанглар рўйхатида биринчи ўринни эгаллаб турибди — 2,4 миллион. Фақат Флойд Мейвезер — Мэнни Пакьяо (4,6 миллион) ва Флойд Мейвезер — Конор Макгрегор (4,3 миллион) ўртасидаги бокс тўқнашувлари бундан яхшироқ натижага эга.
Конор жангдан олдинги қилиқлари билан Нейт Диасга қарши кечган реваншдагига қараганда 1,5 баравар кўпроқ томошабинларни жалб қилишга муваффақ бўлади. Конор (50 минг доллар ва 180 кунлик дисквалификация) ва Ҳабиб (750 минг доллар ва 9 ойлик дисквалификация) жаримага тортилганига қарамай, томошабинлар октагон ичида ҳам, унинг ташқарисида ҳам кўрган нарсаларидан, албатта, зерикмаган. Рақиби жойлашган автобусга стул отиш мисолида Конор баъзида ошириб юбориши мумкин, лекин нима бўлганда ҳам унинг ажойиб шоумен эканлигини инкор этиб бўлмайди.
Тўловлар ҳақида гап кетганда, Конорнинг шартномага кўра 3 миллион доллар, Ҳабиб эса 2 миллион доллар олганини айтиш керак. Пулли трансляция эса камида 150 миллион доллар йиғган, шундан 30 миллионга яқини Конорга, 8 миллиони Ҳабибга тегади. Бундан ташқари, ҳар икки жангчи Reebok’дан 250 минг доллардан бонус олади. Конор ҳаммаси бўлиб 33 миллион доллар, Ҳабиб эса 10 миллион долларгача даромадга эга бўлган.
Изоҳ (0)