БААнинг энг йирик шаҳрида жойлашган Action to Action компанияси бизнес-марказида ташқи кўриниши инсонга ўхшаш робот администратор сифатида иш бошлади. Россия компанияси томонидан яратилган Robo-C номли робот биринчи марта хорижда офис ходими сифатида хизмат кўрсатмоқда, деб хабар беради Hi-Tech.Mail.ru.
Мазкур робот инсонларникига ўхшаш сунъий тери билан қопланган тўлиқ антопоморф механизмдир. У инсонларнинг ҳиссоётларини такрорлайди: кўзларини, қошлари, лаби ва бошқа «мушаклари»ни қимирлатади, шунингдек, мулоқот қилиб, саволларга жавоб беради. Пермдаги Promobot компаниясининг ихтироси инсоннинг 600 дан ортиқ микромимикаларини такрорлашга қодир.
«Бизнинг вазифамиз — инсон-машина ўртасидаги алоқага ўрнатилган тўсиқни бузиб ташлаш», — дейди Promobot директорлар кенгаши раиси Алексей Южаков. Унинг сўзларига кўра, инсон кўринишидаги робот идеал хизмат кўрсатиш формуласи ҳисобланади: у ташқи жиҳатдан одамга ўхшайди, бироқ робот дастури бўйича мулоқот қилади.
Роботнинг стандарт ташқи кўриниши Promobot директорлар кенгаши раисининг юз тузилиши услубида яратилган, бироқ Android’ни маҳаллий шароитга мослаштириш учун унга ўша жойга хос элементлар ҳам қўшилган.
«Кўриниши одамга ўхшаш робот — ажойиб кейс, шу билан бирга, биз бу йўлнинг бошида турибмиз. Технологик база ва самарадорлик имкониятлар ҳамда роботлар ишлатиладиган соҳадан келиб чиқиб такомиллаштирилади», — дейди Action to Action бош директори Рами Кабани.
Бундан олдин, Tesla компанияси 2022 йилда ўзининг Tesla Бот номли одамсимон роботини тақдим этиши тўғрисида хабар берилганди.
Изоҳ (0)