19 май куни Тошкентдаги Inno технопаркда старт олган «Мирзо Улуғбек ворислари» республика танловининг сўнгги босқичи ўз ниҳоясига етди.
3 кун давом этган мусобақада республиканинг турли ҳудудларидан ташриф буюрган 280 нафар иқтидорли ёшлар мини технологияларга асосланган инновацион ишлаб чиқариш, робототехника, инновацион хизматлар, дастурлаш, VR ва AR, қишлоқ хўжалиги ва биотехнология, муқобил энергия, соғлиқни сақлаш, сунъий интеллект, 3D прототиплаш каби йўналишлар бўйича ўз ғоя ва ишланмаларини махсус комиссияга тақдим этишди.
Кўрик-танлов иштирокчилари илгари сурган стартапларнинг аксарияти бугун ҳам долзарб экани, хилма-хиллиги, энг муҳими, уларнинг мактаб ўқувчилари ва талабалар томонидан яратилганлиги танлов ҳайъат аъзолари учун ҳам кутилмаган бўлди дейиш мумкин. Жумладан, танловнинг финал босқичига келган жамоалардан бири робот-кулерни тақдим қилди. Робот сув ичиш учун олдига келган одам билан гаплаша олади, шунингдек, у билан турли мавзуларда суҳбатлашиши ёки қурилмадан фойдаланиш бўйича йўриқнома билан таништириши мумкин. Яна бир фарғоналик иштирокчи танловда ўзи ясаган термоэлектрогенератор билан қатнашди. Ушбу қурилмани иссиқлик ёки оловга яқин тутиш орқали ундан электр энергия олса бўлади.
Айниқса, сурхондарёлик иштирокчи қиз яратган «ақлли ўриндик» тадбир қатнашчиларида катта қизиқиш уйғотди. Мўжаз вентилятор ўрнатилган соябонли «ақлли ўриндиқ»да бир вақтнинг ўзида смартфон ва бошқа электрон қурилмаларни зарядлаш мумкин. Нуфузли танловдан имконияти чекланган ёш олимларимиз ҳам четда қолишмади. Улар ҳам ўз стартаплари билан фаол рақобатга киришиб кетишди. Жумладан, жиззахлик ёш дастурчи Шоҳрух Мамадалиев ҳали мактаб ўқувчиси ва жисмоний имконияти чекланган бўлишига қарамай, онлайн бепул таълим беришга мўлжалланган сайт яратиб, уни йиғилганларга тақдимот қилди. Умуман олганда, қишлоқ хўжалигини дронлар ёрдамида бошқариш, муқобил энергия, суғориш тизимлари каби ранг-баранг лойиҳалар иштирокчилар орасида қизғин рақобат муҳитининг пайдо бўлишига туртки берди.
Ҳайъат аъзоларининг узоқ давом этган муҳокамаларидан сўнг ниҳоят тақдим этилган стартаплар орасидан энг яхши 100 та лойиҳа саралаб олинди. 21 май куни тадбирнинг сўнгги босқичи — тақдирлаш маросимида ғолиб иштирокчиларга ваъда қилинган совринлар топширилди. Уларнинг ҳар бири БҲМнинг 20 баравари (5 400 000 сўм) миқдоридаги пул мукофотлари билан моддий рағбатлантирилди.
Истеъдодли ёшларни қўллаб-қувватлаш «Улуғбек» жамғармаси, Инновацион ривожланиш вазирлиги ҳамда Ёшлар ишлари агентлиги томонидан ташкил этилган кўрик-танловдан кўзланган асосий мақсад — билим олишга интилаётган иқтидорли ёшларни қўллаб-қувватлаш, иқтисодиётнинг турли тармоқларида реал қўлланиладиган ва ўзбекистонликлар фаровонлигини оширишга хизмат қиладиган инновацион лойиҳаларни амалга оширишга кўмаклашишдан иборат бўлиб, танлов ташкилотчилари барча ёшларга ўз ғояларини намойиш этиш учун бирдек, тенг шароит яратиб бериш вазифасини муваффақиятли уддалади дейиш мумкин.
Бу каби кенг кўламли мусобақалар орқали яратилаётган экотизим келгусида Ўзбекистон келажаги учун фойда келтирадиган олимлар етишиб чиқишига замин яратиши шубҳасиз.
Реклама ҳуқуқи асосида.
Изоҳ (0)