Футбол бўйича Италия А Сериясининг сўнгги, 38-турида «Рома» 20 май, жума куни «Торино» билан баҳс юритди.
«Торино» мезбонлигида ўтган баҳс 3:0 ҳисобида «Рома»нинг ғалабаси билан якунланди. Дастлаб биринчи бўлимда Тэмми Абраҳам дубль қайд этиб, меҳмонларнинг устунлигини таъминлади. Англиялик ҳужумчи биринчи вазиятда осонлик билан ҳимоячиларни доғда қолдириб гол урган бўлса, иккинчи вазиятда 11 метрлик жарима зарбасини голга айлантирди. 78-дақиқага келиб Лоренцо Пеллегрини ҳам пенальтидан гол уриб, ўйинга якуни нуқтани қўйди.
Қайд этиш керак, мазкур учрашувда «Рома»нинг ўзбекистонлик ҳужумчиси Элдор Шомуродов 2021 йилнинг 4 декабридан бери илк марта асосий таркибда майдонга тушди. «Бўрилар» ўшанда «Интер»га қарши баҳс олиб борганди.
Шу тариқа «Рома» мавсумни йирик ҳисобдаги ғалаба билан якунлади. Жозе Моуриньо жамоаси умумий ҳисобда 63 очко жамғарди.
Жамоа ҳар қандай ҳолатда ҳам 6-ўриндан пастга тушиб кетмайди ва Европа Лигаси йўлланмасини қўлга киритди — ҳозирча бешинчи бўлиб турибди. 6-поғонадаги «Лацио»нинг ҳисобида ҳам шунча очко мавжуд. Агар «Лацио» билан очколар тенг келиб қолса, ўзаро қарама-қаршиликлардаги устунлик римликлар томонда. Шунингдек, «Рома» Конференциялар Лигаси финалида қатнашади, ҳал қилувчи ўйиндаги ғалаба жамоага Европа Лигаси йўлланмасини тақдим этади.
А Серия
38-тур баҳси
20 май, жума
«Торино» — «Рома» 0:3
Голлар: 0:1 – 33 Абраҳам, 0:2 – 42, пенальти Абраҳам, 0:3 – 78, пенальти Пеллегрини.«Торино»: Бериша, Айна, Родригес (Буонжорно, 46), Лукич, Зима, Ансалди (Сек, 46), Прат, Брекало (Пьяца, 46), Побега, Риччи (Мандрагора, 84), Белотти (Пеллегри, 68).
«Рома»: Руй Патрисиу, Манчини, Кумбула, Рожер, Спинассола (Виня, 83), Залевски (Карсдорп, 58), Сержиу Оливейра (Кристанте, 58), Верету, Пеллегрини (аш-Шаарави, 82), Шомуродов (Занёло, 76), Абраҳам.
Огоҳлантиришлар: Рожер (20), Ансалди (21), Шомуродов (76), Буонжорно (78).
Изоҳ (0)