Вазирлар Маҳкамасининг қарори билан Собир Шукуров Маънавият ва давлат тилини ривожлантириш масалалари департаменти мудири лавозимига тайинланди, деб хабар беради ЎзА.
Собир Шукуров 1973 йил 26 апрель куни Самарқанд вилояти, Каттақўрғон туманида туғилган. 1997 йилда Тошкент давлат университетини, 2010 йилда Ўзбекистон президенти ҳузуридаги Давлат ва жамият қурилиши академиясини тамомлаган.
2011—2017 йилларда Вазирлар Маҳкамаси аппарати Ахборот тизимлари ва телекоммуникациялар масалалари ахборот-таҳлил департаментининг бош мутахассиси, 2017—2019 йилларда Ўзбекистон Матбуот ва ахборот агентлиги бош директорининг биринчи ўринбосари лавозимларида ишлаган. Тайинловга қадар Собир Шукуров Ўзбекистон Миллий ахборот агентлиги — ЎзА бош директорининг биринчи ўринбосари лавозимида ишлаб келаётганди.
Эслатиб ўтамиз, департамент президентнинг 2019 йил 21 октябрдаги ПФ-5850-сон фармонига асосан ташкил этилган. Шу кунгача департаментга Абдуғаффор Қирғизбоев раҳбарлик қилиб келаётган эди.
Изоҳ (0)