Ижтимоий тармоқларда «Қашқадарёда она-болани амакилари ваҳшийларча калтаклади» сарлавҳали видеотасвир тарқалди. Қашқадарё вилоят Ички ишлар бошқармаси ҳолат юзасидан расмий муносабат билдирди.
Қайд этилишича, 2 апрель куни соат 08:00 ларда Қамаши тумани «Майда» МФЙда яшовчи уй бекаси З.Х. яшаш уйида ўтирган вақтида турмуш ўртоғи Х.Ха. ҳамда унинг ака-укалари Х.Х., Х.Фа., Х.Ф. билан келган. Ўзаро жанжаллашиб қолиб, ака-укалар З.Х. ва ўғли Ш.П.га тан жароҳати етказган.
Ҳолат юзасидан Х.Ха., Х.Х., Х.Фа., Х.Ф.га нисбатан Жиноят кодексининг 105-моддаси 2-қисми «г,и,м» банди (ўта шафқатсизлик билан, бир гуруҳ шахслар ёки уюшган гуруҳ аъзоси томонидан ёхуд шу гуруҳ манфаатларини кўзлаб, қуролни ёки совуқ қурол сифатида фойдаланилиши мумкин бўлган ашёларни ишлатиб содир этилган қасддан баданга ўртача оғир шикаст етказиш) билан жиноят иши қўзғатилиб, жабрланувчининг турмуш ўртоғи Х.Ха.га нисбатан қамоққа олиш тарзидаги эҳтиёт чораси қўлланилган.
Ҳозирда мазкур ҳолат юзасидан Қамаши тумани ИИБ Тергов бўлими томонидан тергов ҳаракатлари олиб борилмоқда.
Бундан олдин Фарғонада 45 ёшли эркак хотинини болта билан чопиб ташлагани, Сирдарёда хотинини фарзандининг олдида 14 марта пичоқлаб ўлдирган эркак 17 йилга қамалгани, Бухорода қўшни аёлни ўроқ билан жароҳатлаб ўлдирган шахс қўлга олингани тўғрисида хабар берилганди.
Изоҳ (0)