Сурхондарё вилоятининг Бандихон туманида ўқувчини калтаклаган ўқитувчи Шерзод Юсупов ишдан олинди. Бу ҳақда «Дарё»га вилоят халқ таълими бошқармаси ахборот хизмати раҳбари Рустам Жўраев хабар берди.
Маълум бўлишича, вилоят халқ таълими бошқармаси масъуллари ҳолатни ўрганиб чиққан.«Ўқувчини урган инглиз тили фани ўқитувчиси Шерзод Юсупов, шу мактаб директорининг маънавий-маърифий ишлари бўйича ўринбосари Соат Ортиқов ишдан олинди», — дейди Рустам Жўраев.
Масъулнинг маълумот беришича, директор ўринбосари Соат Ортиқов мактаб ўқувчиларининг телефондан фойдаланиш ҳолати кузатилгани сабаб ишдан олинган.
«Директор Бакир Холмуродовнинг ҳам ишда қолиш-қолмаслиги кўриб чиқилмоқда. Тез орада хулоса қилинади», — дейди вилоят халқ таълими бошқармаси ахборот хизмати раҳбари.
Вилоят халқ таълими бошқармаси ахборот хизмати раҳбари видеода ўқувчилар олдида кўринган яна бир шахснинг кимлигига ҳам аниқлик киритди.
«Видеода кўринган бу киши Жасур Эшбоев бўлиб, шу синф — 9-«Б» синфнинг раҳбари ҳисобланади», — дейди масъул.
Эслатиб ўтамиз, Бош прокуратура зўравон ўқитувчининг иши юзасидан унга нисбатан хизмат текшируви тайинланганини, воқеанинг қонуний якун топиши вилоят прокуратураси назоратида экани хабар берилганди. Халқ таълими вазирлиги вакиллари эса ўқитувчининг ўқувчиларга қўл кўтаришини кескин қоралаганди.
Изоҳ (0)