Давлатимиз раҳбари Шавкат Мирзиёевнинг ташаббуси билан Қорақалпоғистон Республикаси туманлари аҳолиси турмуш фаровонлигини юксалтириш, ҳудудларни ижтимоий-иқтисодий ривожлантириш, янги тадбиркорлик субъектларини ташкил этиш орқали иш ўринларини яратиш, аҳолини қийнаётган турли муаммоларни бартараф этиш мақсадида, Қорақалпоғистоннинг ҳар бир тумани республикамиз вилоятларига бириктирилган. Қонликўл туманининг ижтимоий-иқтисодий ривожланишига масъул этиб Сирдарё вилояти белгиланган.
Қонликўл туманини ижтимоий-иқтисодий ривожлантириш мақсадида, сирдарёлик мутасаддилар, тадбиркорлар, фермерлар томонидан қатор ишлар амалга оширилмоқда. Дастлабки босқичда мутасаддилардан иборат Сирдарё вилояти штаби тузилди ва маҳаллий масъуллар билан ҳамкорликда ҳудуднинг ижтимоий-иқтисодий ҳолати, салоҳияти ва имкониятлари ўрганиб чиқилди. Туманнинг «Драйвер» йўналишлари сифатида чорвачилик ва пиллачилик соҳалари белгиланди. Ҳозирги кунда ҳудудда чорвачиликни ташкил этиш бўйича умумий қиймати 11,8 миллиард сўмлик жами 9 та лойиҳа ва пиллачиликни ташкил этиш бўйича умумий қиймати 71 миллиард сўмлик 1 та лойиҳа шакллантирилди.
Шу пайтгача ҳудуддаги энг катта муаммо ишсизлик эканлигини инобатга олган ҳолда, тикув машинаси, иссиқхона, чорва моллари, парранда ва бошқа олиб бериш ҳисобига 1 150 нафар ишсизларнинг бандлиги таъминланди.
Ҳозирги кунда Қонликўл туманида қиймати қарийб 574 миллиард сўмга тенг 14 та инвестицион лойиҳалар шакллантирилган бўлиб, натижада 1 900 нафар ҳудуд аҳолисининг бандлиги таъминланади.
Ана шундай лойиҳалардан бири сифатида 0,4 гектар ер майдонида ташкил этилган текстил ва тўқимачилик маҳсулотлари ишлаб чиқарувчи «Сирдарё чеварлари» тикувчилик фабрикасини кўрсатиб ўтишимиз мумкин. Фабриканинг лойиҳа қиймати 1,5 миллиард сўм бўлиб, тикув ва бичув машиналари, дазмоллар, мебеллар каби зарурий анжомлар билан жиҳозланган. Мазкур фабрика аҳоли, айниқса, хотин-қизларни доимий иш билан таъминлашда муҳим бўлди. Натижада 120 ишсиз фуқаронинг бандлиги таъминланди.
Best Sun Oil МЧЖ томонидан 3 минг гектар ҳудудда кунгабоқар етиштириш ва қайта ишлаш орқали суткасига 1000 тонна писта ёғини тайёрлаш қувватига эга бўлган саноат кластерини ташкил этиш ишлари олиб борилмоқда. Лойиҳа ишга туширилганидан сўнг 250 нафар фуқаронинг бандлиги таъминланади.
Шунингдек, Ўзбекистон Республикаси Президентининг 2020 йил 2 октябрь кунги Қорақалпоғистон Республикасига ташрифи давомида берилган топшириқларни бажариш мақсадида, 365 та тадбиркорлик субъектининг фаолияти янгидан ташкил этилди ва натижада 556 та иш ўрни яратилди.
Ҳудуддаги кам таъминланган, «Темир дафтар», «Аёллар дафтари» ва «Ёшлар дафтари» рўйхатида турувчи оилаларни қўллаб-қувватлаш мақсадида, жами 120 миллион сўмлик 10 минг туп мевали дарахт кўчатлари, қиймати 45 миллион сўм бўлган товуқлар тарқатилди. 100 та оиланинг ҳар бирига 1 сотихга мўлжалланган иссиқхона қуриб берилди. Бунинг учун 1,5 миллиард сўм маблағ йўналтирилган. Амалга оширилган ишлар натижасида «Темир дафтар»дан 1 590 та оила, «Аёллар дафтари»дан 1855 нафар хотин-қизлар, «Ёшлар дафтари»дан 1219 нафар ёшлар чиқарилди.
Туманда аҳолининг турмуш шароитини яхшилашга қаратилган лойиҳалар ҳам амалга оширилмоқда. Жумладан, Қонликўлнинг барча маҳаллаларида замонавий жиҳозланган, шаҳардагидан кам бўлмаган шароитларга эга эркаклар ва аёллар учун алоҳида кўчма ҳаммомлар қуриб берилмоқда ҳамда аҳолига янада қулай шароит яратиш мақсадида атрофи ободонлаштирилиб, кўркам масканларга айлантирилмоқда. Маҳаллий аҳолининг эҳтиёжларидан келиб чиққан ҳолда хароб ҳолатдаги 22-сонли ўрта мактаб биноси туман ҳокимлиги захирасига қайтариб олинди ва унинг ўрнида замонавий мактабгача таълим муассасаси ташкил этиш бўйича ишлар олиб борилмоқда. Шунингдек, туман ҳудудида икки халқ қардошлигининг абадийлиги рамзи сифатида 10 гектарлик «Дўстлик» боғи ташкил этилган бўлиб, ҳудуднинг бир қисмига мутахассисларнинг тавсияларини инобатга олган ҳолда синов тариқасида қовун етиштириш йўлга қўйилмоқда.
Таъкидлаб ўтиш лозимки, амалга оширилаётган ишларнинг самарадорлигини ошириш мақсадида ҳар бир маҳалла Сирдарё вилоятининг туманларига бириктирилган. Жумладан, Сайхунобод тумани «Бискўпир» маҳалласи учун масъулиятни ўз зиммасига олган. Белгиланган вазифаларни бажариш мақсадида туман мутасаддилари томонидан маҳалладаги кам таъминланган оилаларга 10 та тикув машинаси, 10 бош қорамол, мини инкубатор цехи, мотокультиватор, электросварка аппарати улашилди. Шунингдек, ишсиз фуқаролар рўйхати шакллантирилиб, уларга 2 сотихлик иссиқхоналар қуриб берилиши режалаштирилган. «Қонликўл» маҳалласига бириктирилган Гулистон тумани вакиллари томонидан ҳам бир қатор ишлар амалга оширилмоқда. Хусусан, кўчалар бўйлаб 5 мингдан ортиқ манзарали дарахт кўчати ўтқазилди. 60 та хонадоннинг фасад қисми бўялиб, тартибга келтирилди. Вилоят вакилларининг маҳалладаги ўрганишлари асносида «Темир дафтар», «Аёллар дафтари», «Ёшлар дафтари» да турувчи оилаларга 300 бош товуқ, 10 та тикув машинаси, 10 та микротўлқинли печлар тарқатилди. Шунингдек, Ховос тумани мутасаддилари томонидан «Маданият» ва унга туташ «Дўстлик», «Наврўз» маҳаллаларидаги 30 гектар томорқа ер майдонини сув билан таъминлаш имкониятига эга қуввати 15 кВт бўлган 350 от кучили сув ости насоси ҳамда КТПС 100 кВА қувватли трансформатор ўрнатилди.
Реклама ҳуқуқи асосида.
Изоҳ (0)