Ижтимоий тармоқда Андижон вилоятининг Шаҳрихон туманида Nexia-3 ва Tico автомобиллари ўртасида тўқнашув содир бўлгани тасвирланган видео тарқалди. ИИВ ЙҲХХ ҳолатга муносабат билдириб, ҳозирда терговолди суриштирув ҳаракатлари олиб борилаётганини маълум қилди.
Маълум қилинишича, 6 май куни соат 10:00 ларда туманнинг «Сегазақум» МФЙ ҳудудидан ўтувчи А-373 Ўш—Андижон—Тошкент автомобиль йўлининг 412-километрида 49 ёшли ҳайдовчи Қ.Х. бошқарувидаги Tico ҳамда 28 ёшли Х.Б. бошқарувида бўлган Nexia-3 автомобиллари иштирокида йўл-транспорт ҳодисаси содир бўлган.
ЙТҲ оқибатида Tico автомобиль ҳайдовчиси Қ.Х. тан жароҳати билан шифохонага ётқизилган.
Содир бўлган авария юзасидан туман ИИБ ҳузуридаги Тергов бўлими ходимлари томонидан дастлабки терговолди суриштирув ҳаракатлари олиб борилмоқда.
Аввалроқ Фарғонада Tracker ва Gentra тўқнашуви оқибатида йўловчи ҳалок бўлгани, Тошкентда 4 та машина иштирокида ЙТҲ юз бергани, Гулистонда ҳайдовчиси ухлаб қолган Damas пиёдалар ўтиш кўпригига урилгани тўғрисида хабар берилганди.
Изоҳ (0)