Тошкент вилоят прокуратураси томонидан Қибрай туманида ер талон-торож қилиниши билан боғлиқ навбатдаги жиноят фош этилди. Бу ҳақда Бош прокуратура матбуот хизмати хабар берди.
Маълум қилинишича, тумандаги «С.И.» масъулияти чекланган жамият ва «Д.М.» хусусий корхонасининг норасмий раҳбари ҳисобланувчи Б.И. ва раҳбари Ф.К. МЧЖ балансидаги Салар массиви «Бобур» МФЙ ҳудудида жойлашган 66,02 балл бонитетли 1 гектар ер участкасидаги иссиқхонани қайта реконструкция қилишга «рухсатнома» олган. Улар қишлоқ хўжалиги учун мўлжалланган ер участкасида қурилиш ишларини бошлаб, суғориладиган экин ер майдонини муомаладан чиқарган ва 1,029 миллиард сўм миқдорда зарар етказган.
Бундан ташқари, Ф.К. бир вақтнинг ўзида МЧЖ раҳбари бўла туриб, ушбу жамиятларнинг норасмий раҳбари Б.И. билан биргаликда «Агрокимёҳимоясервис» МЧЖ балансидаги, 2021 йилда аукцион савдолари орқали «Д.М.»га сотиб юборилган 4,13 гектар суғориладиган ер участкасининг 0,75 гектар қисмида ҳам қурилиш ишларини бошлаб, 774 миллион сўм миқдорда зарар етказган.
Мазкур ҳолат юзасидан Ф.К., Б.И. ва бошқаларга нисбатан Жиноят кодексининг тегишли моддалар билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Аввалроқ Сурхондарёда фермер хўжалигига тегишли 6 сотих ер ўзбошимчалик билан эгаллаб олингани, Қарши шаҳрининг амалдаги ва собиқ ҳокими 156 миллиард сўм бўлган ерни ноқонуний бериб юборгани, Навоийда ноқонуний уй-жой қуриш билан шуғулланган жиноий гуруҳ аъзолари қўлга олингани тўғрисида хабар берилганди.
Изоҳ (0)