Фото: Ҳинд киносининг энг машҳур жуфтликлари йиллар давомида қанчалик ўзгарди?

Bollywoodtime нашри ўтган асрнинг 70–80 йилларида экран орқали барчанинг кўнглидан жой олган севимли жуфтликлар вақт ўтиши билан қандай ўзгарганини кўриб чиқди.

Ҳема Малини ва Дҳармендра

Бу ажойиб жуфтлик томошабинларга 30 га яқин ҳамкорликдаги фильмларни тақдим этди, улар орасидан «Зита ва Гита», «Қасос ва қонун», «Севимли Ража», «Али Бобо  ва қирқ қароқчи» фильмлари муваффақиятга эришган. Улар нафақат экранда, балки ҳаётда ҳам ҳинд киносининг кўплаб мухлисларининг севимли жуфтлигидир. Юлдузли жуфтлик 40 йилдан кўпроқ вақт давомида бахтли ҳаёт кечириб келмоқда ва биргаликда 6 фарзандни тарбиялаб, 13 набиранинг бобо ва бувисига айланган.

Риши Капур ва Димпл Кападия

Риши ва Димпл 1973 йилда «Бобби» дебют фильми чиққандан кейин машҳурликка эришди. Ёш жуфтлик бутун дунё бўйлаб миллионлаб томошабинларнинг қалбини забт этди. Собиқ иттифоқ даври прокатида ушбу фильм барча даврларда энг кўп ташриф буюрилган хорижий фильмлар рейтингида 22-ўринни эгаллайди.

«Бобби» фильмидан кейин Димпл болаларни тарбиялаш учун кинони тарк этди, лекин бир неча йил ўтгач, у яна қайтди ва Риши билан бир неча марта биргаликда суратга тушди. Афсуски, 2020 йил апрель ойида Риши Капур саратон касаллигидан вафот этди.

Амитабҳ Баччан ва Рекҳа

Болливуддаги энг кўп муҳокама қилинган жуфтликлардан бири томошабинларга 10 га яқин қўшма лойиҳаларни тақдим этди. Кўп йиллар ўтган бўлса-да, уларнинг ҳақиқий ҳаётдаги романтикаси ҳали ҳам оммавий ахборот воситаларида муҳокама қилинмоқда. Бир вақтлар Рекҳа ва Амитабҳ тадбирларда бир-бирлари билан учрашишдан астойдил қочган, аммо энди улар бир-бирларини кўрса, саломлашади. Иккаласи ҳам ажойиб кўринишда бўлиб, кексаликни муносиб кутиб олган.

Анил Капур ва Шридеви

«Жаноб Ҳиндистон», «Муҳаббат лаҳзалари», «Айрилиқ» — уларнинг Болливуддаги жуфтлиги ҳақиқатан ҳам ажойиб эди. Ҳақиқий ҳаётда қайнука ва келинойи — Анил ва Шридеви биргаликда ўндан ортиқ лойиҳаларда иштирок этди. Шридеви 80-90 йилларда Болливудда машҳурликка эришди ва она бўлгач, соҳани тарк этди. Афсуски, 2018 йилда актриса бахтсиз ҳодиса туфайли вафот этди.

Нилам ва Говинда

80 йилларнинг охирида Нилам Говинданинг нафақат экранда, балки ҳаётда ҳам севимли йўлдоши эди. Мафтункор ва бир-бирига ошиқ бўлган жуфтлик 14 та фильмда суратга тушди. Афсуски, Говинда аллақачон турмуш қурган ва фарзандли экани маълум бўлгач, уларнинг ажойиб севги ҳикояси якун топди. Оғриқли айрилиқдан сўнг улар узоқ вақт мулоқот қилмаганди ва яқинда улар мусиқий шоуда яна учрашишди. Узоқ вақтдан бери давом этган гиналар унутилди, чунки иккиси ҳам ўзининг турмуш ўртоқлари билан бахтли.

Амир Хон ва Жуҳи Чавла

Болливуднинг экрандаги энг муваффақиятли жуфтликларидан бири Амир ва Жуҳи 80-90 йилларнинг севимлилари эди. Уларни гўзал севги ҳикоялари ва саҳна ортидаги илиқ дўстлик машҳур қилди. Афсуски, суратга олиш майдончасидаги келишмовчиликларнинг биридан сўнг Амир ва Жуҳи бирга ишламади, лекин охир-оқибат, тадбир ва маросимларда ярашиб олишди.

Санни Деол ва Мадҳури Дикшит

Санни ва Мадҳури ҳам томошабинларни ўзига жалб этувчи Болливуд актёрлари каби машҳур эди. Жуфтлик яқинда мусиқий шоуда учрашиб қолди ва ўзларининг машҳур «Маин Тери Моҳаббат Меин» трекига рақсга тушди.