Пауло Дибала келажаги борасида бир қарорга келди. У «Ювентус»ни тарк этади

«Ювентус» ҳужумчиси Пауло Дибала фаолиятини «Интер»да давом эттиради.

La Gazzetta dello Sport нашрининг хабарига кўра, ҳужумчи «нераззурилар» билан 4 йиллик шартнома имзолашга яқин. Аргентиналик «Интер» сафида бонуслардан ташқари йилига 6 миллион евро ишлаб топади.

Яқинда шартномаларини янгилаган Лаутаро Мартинес ва Марсело Брозович ҳам «Интер»да йилига 6 миллион евро маош олади. Дибалага ҳам шунча маош тўлаши учун миланликлар Артуро Видаль, Алексис Санчес ва Матиас Весино билан хайрлашмоқчи.

Европанинг турли клублари, жумладан, Мадриднинг «Атлетико»си ҳам Дибалага қизиқиш билдирганди. Аммо «нераззурилар» бошқаларга қараганда қатъиятлироқ ҳаракат қилди.

«Интер» Паулони кейинги мавсумдан бошлаб клубнинг спорт лойиҳасида асосий рол ишониб топширишига ишонтира олди. Ундан ташқари, бошқа лигага ўтмасдан, фаолиятини А Серияда давом эттириш Дибаланинг асосий мақсадларидан бири эди.

Аргентиналик билан музокараларда футболчи билан яхши муносабатда бўлган Милан клуби бош директори Беппе Маротта муҳим рол ўйнади. Айнан Мароттанинг ҳаракатлари билан Дибала 2015 йилда «Палермо»дан «Ювентус»га ўтган эди.

Эслатиб ўтамиз, аргентиналик футболчининг «Ювентус» билан шартномаси 2022 йил ёзида ўз ниҳоясига етади ва у эркин агент сифатида клубни тарк этади.

28 ёшли футболчи 2021/22 йилги мавсум «Ювентус» сафида барча мусобақаларда 35 та ўйин ўтказиб, 14 та гол ва 6 та голли узатмага муаллифлик қилди.