Самарқанд туманида 25 ёшли аёл вояга етмаган қизнинг қулоғидаги зиракни ўғирлаб кетгани аниқланди, деб хабар беради Самарқанд вилояти ИИБ ахборот хизмати.
Ижтимоий тармоқларда Самарқанд вилоятида бола ўғрилари пайдо бўлгани, улар қизалоқни олдига келиб, уни алдаб олиб кетишгани тўғрисида хабарлар тарқалди. Вилоят ИИБга кўра, номаълум шахс қизчани эмас, унинг қулоғида зиракни ўғирлаган.
Маълум қилинишича, 26 апрель куни Самарқанд тумани «Обод» маҳалласида яшовчи фуқаро туман ИИБга ариза билан мурожаат қилиб, 25 апрель куни «Қўшкўприк» маҳалласи ҳудудида 8 ёшли қизининг вояга етмаганидан фойдаланиб, унга билдирмасдан қулоғидаги тилла зирагини номаълум шахс ўғирлаб кетганини билдирган.
Туман ИИБ ходимлари томонидан олиб борилган тезкор тадбирлар натижасида ушбу жиноятни 25 ёшли Сабина М. содир этгани аниқланиб, қўлга олинган.
Мазкур ҳолат юзасидан Самарқанд тумани ИИБ ҳузуридаги тергов бўлими томонидан Сабина М.га нисбатан Жиноят кодексининг 169-моддаси (ўғрилик) 1-қисми билан жиноят иши қўзғатилган.
Шунингдек, Самарқанд вилояти ИИБ ижтимоий тармоқларда бола ўғрилари пайдо бўлгани, улар қизалоқни олдига келиб, уни алдаб олиб кетишгани остида тарқалган хабарларга муносабат билдирган.
«Айни дамда текшириб кўрилмаган, асоссиз маълумотларни тарқатиб, ваҳима уйғотаётган кимсаларнинг шахсларини ҳам аниқлаш бўйича чора кўрилмоқда. Ҳурматли фуқаролар, сиздан миш-мишлардан келиб чиққан асоссиз маълумотларни тарқатмасликни сўраймиз. Ваҳима ва миш-мишлар манбаи бўлиб қолманг», — дейилади муносабатда.
Аввалроқ Тошкентда беш нафар бола ўғирлангани тўғрисида тарқалган хабарлар рад этилганди.
Мавзуга доир:
- Деновда 4 ёшли қизнинг тилла зирагини ўғирлаш учун унга 4 та уйқу дори берган мактаб ўқувчисига жиноят иши қўзғатилди
- Фарғонада қайнонасининг тилла тақинчоқларини ўғирлаган келинга жиноят иши қўзғатилди. Энди у уч йилгача қамалиши мумкин
- Тошкентда қарийб 36 млн сўмлик тилла тақинчоқларини ўғирлатганини айтган аёлнинг ўзи бу ишни қилгани аниқланди
Изоҳ (0)