Тошкент вилояти ИИББ ЖҚБ Гиёҳвандлик воситалари билан қонунга хилоф равишда муомала қилишга қарши курашиш бўлими ва унинг қуйи тизим ходимлари томонидан ўтказилган тезкор-қидирув тадбирлари натижасида 10 га яқин шахсдан иборат бўлган жиноят занжири узилди. Бу ҳақда вилояти ИИББ ахборот хизмати хабар берди.
Хусусан, Зангиота тумани «Тўқимачи» маҳаллада яшовчи Қ.С. (1983 йилда туғилган) 18 ёшли шартли харидорга тўрт дона таркибида кучли таъсир қилувчи модда бўлган дори воситасини 250 минг сўмга сотаётган вақтида холислар иштирокида ушланган. Шунингдек, унинг ёнидан 10 дона шу турдаги дори воситаси далилий ашё сифатида расмийлаштирилиб олинган.
Шу тариқа бошланган тезкор тадбир давом эттирилиб, ушбу шахс ва бошқаларни дори билан таъминлаётган Учтепа туманида яшовчи 42 ёшли Жавлон, 52 ёшли Бахтиёр, Олмазор ва Юнусобод туманида яшовчи 25 ва 27 ёшли Рустам ҳамда Муҳаммад, Тошкент туманида яшовчи 44 ёшли Шерзод, 31 ёшли Жасур исмли шахслар ҳам шартли харидорга дориларни сотаётган вақтида ушланган.
Шунингдек, Чилонзор туманидаги дорихоналардан бирида сотувчи бўлиб ишловчи 24 ёшли Жавоҳир эса 200 дона шу каби кучли таъсир қилувчи дорини 3 миллион сўмга сотган вақтида қўлга олинган. Унинг автомашинасидан 590 дона шу турдаги дори воситалари далилий ашё сифатида олинган.
Ўтказилган тезкор-қидирув тадбирлари натижасида, 9 нафар шахс қўлга олинган бўлса, улардан бозор нархи 34 миллион сўмга тенг бўлган, жами 1 351 дона кучли таъсир қилувчи дори воситаси ноқонуний муомаладан олинган. Ҳозирда ҳолат юзасидан тергов ҳаракатлари олиб борилмоқда.
Аввалроқ ДХХ Бухорода гиёҳванд моддани 2,5 минг долларга сотишга уринган Афғонистон фуқаросини ушлагани, Тошкентда Фармацевтика институти талабаси психотроп моддаларни сотиш билан шуғуллангани учун 4 йилга қамалгани тўғрисида хабар берилганди.
Изоҳ (0)