Ўзбекистонда олий таълим муассасаларига кириш тест синови учун тўлов ундирилмайдиган абитуриентлар тоифаси кенгайди. Бу ҳақда Давлат тест маркази хабар қилди.
Қайд этилишича, тест синовлари ташкил этилаётган ўқув йилидан аввалги йилларда таълим муассасаларини тугатган абитуриентлардан тест синовларида иштирок этиши учун базавий ҳисоблаш миқдорининг ярим баравари миқдорида тўлов ундирилади. Бунда қуйидаги тоифадаги абитуриентлардан тўлов ундирилмайди:
- тест синовлари ташкил этилаётган йилда таълим муассасаларини тугатган абитуриентлар;
- ногиронлиги бўлган шахслар;
- тўлиқ давлат таъминотидаги шахслар (Меҳрибонлик уйи ва Болалар шаҳарчасининг битирувчилари).
- «Ижтимоий ҳимоя ягона реестри» ахборот тизимида рўйхатга олинган шахслар ва уларнинг фарзандлари;
- «ёшлар дафтари»га киритилган ёшлар.
Эслатиб ўтамиз, Ўзбекистонда 2019 йилги тест синовларида абитуриентлардан қарийб 900 млн сўм ортиқча тўлов ундирилганди. ДТМ ҳолатга муносабат билдириб, «тўловни амалга оширмайдиган абитуриентлар томонидан ҳужжатларни топшириш жараёнида тест синови учун тўловни амалга ошириш ҳолатлари кузатилгани, бунинг натижасида 896,4 миллион сўм ортиқча тўлов амалга оширилган»ини маълум қилган.
Изоҳ (0)