Қашқадарё вилоятининг Қарши шаҳрида компьютер тизимига кириб, ўғрилик содир этган шахс Тошкент шаҳрида ушланди. Қўшнисининг қўйини ўғирлаган шахсга эса жиноят иши қўзғатилди. Бу ҳақда вилоят ИИБ ахборот хизмати хабар берди.
Маълум қилинишича, Қарши шаҳрида яшовчи фуқаро компьютер тизимига рухсатсиз кириб, ўғрилик содир этгани учун Жиноят кодексининг 169-моддаси 3-қисми «б» банди билан айбланган. Фуқаро жавобгарликдан қутулиш мақсадида яширинишга уринган. Шундан сўнг унга нисбатан қидирув эълон қилиниб, гумондор Қарши шаҳар ИИБнинг тезкор ходимлари ҳамда ЙҲХБ инспектори томонидан 2022 йил 17 апрель куни Тошкент шаҳрида ушланган.Шунингдек, Қаршида 2022 йил 11 апрель куни қўшнисининг уч бош қўйини ўғирлаган шахс қилмиши ҳам ошкор бўлди.
Қарши шаҳрининг «Қавали» маҳалласида яшовчи фуқаро Б.Л. шаҳар ИИБга ариза билан мурожаат қилиб, номаълум шахс 2022 йил 10 апрель кунига ўтар кечаси яшаш хонадонининг ён томонида жойлашган қурилиши битмаган турар жойидан бозор баҳоси 6 миллион сўм бўлган уч бош қўйини ўғирлаб кетганини билдирган.
Олиб борилган тезкор-суриштирув ишлари натижасида мазкур жиноятни Қарши шаҳрининг «Кат» маҳалласида яшовчи У.И. содир этганлиги аниқланган. Қарши шаҳар ИИБ тергов бўлими томонидан фуқарога нисбатан Жиноят кодексининг 169-моддаси 2-қисми «в» (бир гуруҳ шахслар томонидан олдиндан тил бириктириб ўғрилик содир этиш) банди билан жиноят иши қўзғатилган.
Изоҳ (0)