Жамоат транспорти — жамоатники. «Тошшаҳартрансхизмат» матбуот хизмати маълумотларига кўра, биргина Тошкент шаҳрида ушбу транспорт таркибига кирувчи автобуслардан 2021 йилнинг ўзида 147 миллион 225 минг 100 нафар йўловчи фойдаланган. Юз ёки минг эмас, миллионлаб кишини манзилига элтадиган транспорт хавфсиз, қулай, ишончли бўлиши керак.
Охирги икки йил — 2021—2022 йиллари автобусларга оид одамни хавотирга соладиган йўл-транспорт ҳодисалари ҳақидаги хабарлар шунчалик кўпайдики, аксар йўловчи бу транспорт воситасидан фойдаланиш ёки йўқлиги борасида иккиланиб ҳам қолди. «Дарё» сўнгги икки йилдаги автобуслар билан боғлиқ энг аянчли, қурбонлари бор, атрофдагилар саломатлиги ва ҳаракат хавфсизлигига хавф туғдирган ЙТҲларни бир саҳифага жамлади.
Тошкентда автобус бекатда турган икки пиёдани уриб юборди
2021 йил 28 апрель куни соат 13:45 атрофида 86-сонли йўналишда ҳаракатланувчи Mercedes-Benz автобуси икки пиёдани уриб юборган.«Тошшаҳартрансхизмат» суриштирувига кўра, воқеа қуйидагича бўлади. Ҳайдовчи ТҲАЙ кўчаси бўйлаб бошқариб бораётган вақтда юрак-қон томир жарроҳлик клиникаси бекатида унга нисбатан олдинда кетаётган транспорт воситаси кескин тўхташи натижасида автобусни ўнгга бурган ва бекат ёнида турган икки пиёдани уриб юборган.
Жабрланувчи пиёдалар Н.Д ва О.Л.га ҳодиса оқибатида енгил тан жароҳати етган ва 16-тез тиббий ёрдам кўрсатиш шифохонасига етказилган.
Йўл-транспорт ҳодисаси ҳақидаги хабарда автобус ҳайдовчиси М.А.га нисбатан Маъмурий жавобгарлик тўғрисидаги кодекснинг 133-моддаси (транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши) аломатлари мавжудлигини инобатга олиб, маъмурий иш қўзғатилгани ҳамда дастлабки тергов ҳаракатлари олиб борилаётгани айтилган.
Isuzu Matiz’га урилиб кетиб, ағдарилди. Тўрт йўловчига тан жароҳати етди
2021 йилнинг 7 май куни соат 11:15 атрофида Тошкент шаҳри Сергели туманида 130-сонли Isuzu автобуси иштирокида ЙТҲ содир бўлган. Қайд этилишича, 12-автобус саройи тасарруфидаги ушбу Isuzu Нилуфар 3-тор кўчаси бўйлаб Нилуфар чорраҳаси томон бошқариб келинаётган вақтда мазкур чорраҳада Matiz русумли енгил автомобиль унинг чап томонига келиб урилган. Натижада автобус мувозанатни йўқотиб, ағдарилган.Дастлабки маълумотларда ушбу йўл-транспорт ҳодисаси Matiz ҳайдовчисининг йўл ҳаракати қоидаларини бузиши натижасида содир бўлгани айтилган.
Мазкур ЙТҲ оқибатида автобуснинг тўрт нафар йўловчисига тан жароҳати етган ва улар Республика шошилинч тез ёрдам илмий марказига етказилиб, тез тиббий ёрдам кўрсатилган.
Самарқанддаги автобус ва Nexia тўқнашиши оқибатида енгил машина ҳайдовчиси вафот этди
2021 йил 18 май куни Самарқанд вилоятининг Булунғур туманида Nexia-3 ҳамда автобус иштирокида авария содир бўлган. Оқибатда енгил автомашина ҳайдовчиси ҳалок бўлган. Автобус ҳайдовчиси эса туман Тиббиёт бирлашмасига мурожаат қилган.
Тафсилотларга кўра, соат 00:30 ларда туманнинг «Кичик келдон» МФЙ ҳудудидан ўтувчи 4Р-47 ички автомобиль йўлининг 16-километрида 28 ёшли Nexia-3 ҳайдовчиси рул бошқарувини йўқотиши натижасида қарама-қарши йўналишга чиқиб кетган ва 25 ёшли фуқаро бошқарувидаги автобус билан тўқнашган.
Тошкентда икки автобус иштирокида ЙТҲ содир бўлди. Оқибатда бир пиёда ҳалок бўлди
2021 йил 29 май куни Тошкент ҳалқа йўли ва Бунёдкор шоҳкўчалари кесишмасидаги айланма кўприк устида икки автобус иштирокида ЙТҲ содир бўлган. Маълум қилинишича, автобуслардан бири пиёдалар ўтиш йўлагидан ўтаётган фуқароларга йўл бериб тўхтаган пайтда унинг ортидаги бошқа бир Isuzu ҳайдовчиси ўз вақтида тормозланишни амалга ошира олмай, унинг ортига келиб урилган.
Дастлабки тахминларда авария автобуснинг белгиланган меъёрдан ортиқ тезликда ҳаракатлангани натижасида келиб чиққани айтилган. Авария оқибатида пиёдалардан бири оғир аҳволда шифохонага юборилган. Бироқ жабрланувчи шифохонага етиб бориши билан вафот этган.
Самарқандда Damas ва автобус тўқнашуви оқибатида икки йўловчи ҳалок бўлди
Самарқанд вилояти Пайариқ туманида 2021 йил 1 июль куни соат 12:00 ларда Damas ва автобус иштирокида ЙТҲ содир бўлган.
«Эшмонсоқ» МФЙ ҳудудидан ўтувчи 4Р-48 автомобиль йўлининг 26-километрида Жиззах—Гагарин—Самарқанд—Пайариқ йўналишида аҳолига хизмат кўрсатувчи автобус йўлига қарама-қарши томондан ҳаракатланиб келаётган Damas автомобилининг чиқиб кетиши натижасида тўқнашув содир бўлган.
Оқибатда Damas ичида бўлган икки нафар фуқаро ҳодиса жойида вафот этган. ЙТҲ ҳақидаги хабарда ҳолат юзасидан вилоят ИИБ ҳузуридаги Тергов бошқармаси томонидан Жиноят кодексининг 266-моддаси 3-қисми (одамлар ўлимига сабаб бўлган транспорт бошқариш қоидаларини бузиш) билан жиноят иши қўзғатилгани айтилган.
Қорақалпоғистонда автобус ва юк машинаси иштирокида содир бўлган ЙТҲ оқибатида икки киши ҳалок бўлди
2021 йил 14 июлда Қорақалпоғистонда автобус ҳамда юк автомобили тўқнашгани ҳақида хабар берилган.Қайд этилишича, Кегейли туманидан Нукус шаҳри томон ҳаракатланган Isuzu автобусига Чимбой туманидан айланма йўл орқали ҳаракатланган «ГАЗ-5312» юк машинаси келиб урилган.
ЙТҲ оқибатида бир киши воқеа жойида вафот этган, икки киши шифохонага ётқизилган. Таъкидланишича, автобуснинг иккинчи йўловчиси ҳам туман шифохонасида вафот этган.
Аварияга учраган транспорт воситаларининг ҳолати ўрганилганда юк машинаси қайта жиҳозлангани, мавсумий техник кўрикдан ўтмагани аниқланган.
Жиззахда ухлаб қолган Cobalt ҳайдовчиси Yutong автобусига бориб урилди. Енгил машинанинг 2 нафар йўловчиси вафот этди
2021 йил 5 октябрь куни соат 05:00 ларда Шароф Рашидов тумани ҳудудидан ўтган халқаро аҳамиятга эга М39 автомобиль йўлининг 974-километрида Cobalt’ни бошқариб кетаётган 39 ёшли нукуслик фуқаро ўзидан олдинда ҳаракатланиб кетаётган Yutong автобусининг орқа қисмига бориб урилган.
Дастлабки суриштирув давомида ушбу ЙТҲнинг келиб чиқишига Cobalt автомашинаси белгиланган тезлик меъёрларига амал қилмагани ва ҳайдовчининг рул бошқарувида ухлаб қолиши сабаб бўлгани аниқланган.
Машина ичида бўлган икки йўловчи воқеа жойида вафот этган. Cobalt ҳайдовчисининг ўзи эса ўнг қовурғалари синиши ташхиси билан Республика шошилинч тиббий ёрдам илмий маркази Жиззах филиалига ётқизилган.
Тошкентда автобус йўлнинг белгиланмаган қисмидан ўтаётган пиёдани уриб кетди. Пиёда воқеа жойида вафот этган
2021 йилнинг 10 декабрь куни соат 18:40 ларда Юнусобод тумани Амир Темур кўчаси «Минор» метро бекати қаршисида ҳайдовчиси Т.Ж. (1990 йилда туғилган) бошқарувидаги давлат рақами 01 968 ХАА бўлган 72-сонли йўналишли автобус ҳаракатланаётган вақтида, йўлнинг белгиланмаган қисмидан кесиб ўтаётган пиёда Т.У.ни уриб юборган.
Оқибатда пиёда олган жароҳатлари туфайли воқеа жойида вафот этган. ЙТҲ ҳақидаги хабарда ҳолат юзасидан Тошкент шаҳар прокуратураси томонидан терговга қадар текширув ўтказилаётгани айтилган.
Тошкентда автобус бошқарувни йўқотиши оқибатида 8 та транспорт иштирокида ЙТҲ содир бўлди
2021 йил 12 декабрь куни Тошкент шаҳри Чилонзор туманида 8 та транспорт воситаси иштирокида ЙТҲ содир бўлган. Маълум қилинишича, соат 15:00 да туманнинг Дўмбиробод чорраҳасида 70-сон маршрут бўйича ҳаракатланувчи Isuzu автобуси ҳайдовчиси ҳаракат пайтида бошқарувни йўқотган.
Оқибатда Labo, Spark, 2 та Nexia-3, 2 та Matiz ва Lacetti автомобиллари тўқнашувига сабабчи бўлган. Автобус ва Лабо ҳайдовчисига тан шикасти етган. Уларга тиббий ёрдам кўрсатилган. Ҳодиса ҳақидаги хабарда ҳолат юзасидан терговолди текшируви ўтказилаётгани айтилган.
Қашқадарёда «Жигули» автобус билан тўқнашди. Автомобиль ҳайдовчиси воқеа жойида вафот эди
2021 йилнинг 11 декабрь куни соат 17:10 ларда Қашқадарё вилояти Нишон тумани ҳудудидан ўтувчи 4Р-89 автомобиль йўлининг 31-километрида ҳайдовчи Т.Б. (1988 йилда туғилган) «ВАЗ-2103» автомобилини юқори тезликда бошқараётиб, рул бошқарувини йўқотган ва қарама-қарши йўналишдан ҳаракатланиб келаётган ҳайдовчи У.Б. (1996 йилда туғилган) бошқарувидаги Isuzu автобуси билан тўқнашган.
Оқибатда «ВАЗ-2103» автомобили ҳайдовчиси Т.Б. оғир тан жароҳати олиб, воқеа жойида вафот этган ҳамда ушбу автомобиль йўловчиси Э.А. (2013 йилда туғилган) ва автобус йўловчиси М.Р. (1973 йилда туғилган) тан жароҳати олиб, шифохонага ётқизилган.
ЙТҲ ҳақидаги хабарда ҳолат юзасидан Нишон тумани ИИБ ҳузуридаги ТБ томонидан дастлабки тергов ҳаракатлари олиб борилаётгани айтилган.
Тошкентда маст пиёда автобус босиб кетиши оқибатида ҳалок бўлди
2022 йил 6 январь куни соат 19:50 атрофида Тошкент шаҳри Олмазор тумани Уста Ширин кўчасида йўловчи автобуси пиёдани босиб кетган. Қайд этилишича, Isuzu русумли автобус ҳайдовчиси (1964 йилда туғилган, иш стажи — 35 йил) 43-сонли йўналишда ҳаракатланиб бораётганда Жомий қурилиш бозори олдидаги светофорда тўхташ учун секинлашган. Шу вақт йўл қатнов қисмининг биринчи бўлагида кетаётган пиёда тўсатдан мувозанатни йўқотиб, автобус томонга йиқилган.
Оқибатда фуқаро воқеа жойида ҳалок бўлган. ЙТҲ ҳақидаги хабарда дастлабки хулосага кўра, пиёданинг маст бўлгани ва ҳолат бўйича дастлабки тергов ишлари олиб борилаётгани айтилган.
Тошкентда 70 ёшли фуқаро автобус босиб юбориши оқибатида вафот этди
2022 йил 8 март соат 11:30 да Тошкент шаҳар Чилонзор тумани Чилонзор кўчасида MAN автобуси ҳайдовчиси С.М. пиёдаларни уриб юбориши оқибатида бир киши ҳалок бўлди.1996 йилда туғилган ҳайдовчи автобусни бошқариб кетаётиб, тартибга солинган пиёдалар ўтиш жойида пиёдаларни уриб юборган. Оқибатда пиёда Р.З. (1952 йилда туғилган) олган тан жароҳатлари сабабли шифохонада вафот этган.
Шунингдек, Р.Й. исмли фуқаро (2017 йилда туғилган) бош соҳаси лат ейиши ташхиси билан шифохонага ётқизилган.
ЙТҲ ҳақидаги хабарда ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми аломатлари билан жиноят иши қўзғатилгани айтилган.
Фарғонада автобусни қувиб ўтишга уринган Nexia Isuzu билан тўқнашди. Енгил машина ҳайдовчиси вафот этди
2022 йил 19 мартда Фарғона вилоятининг Ўзбекистон туманида Nexia автомобили ҳайдовчиси ҳаракат давомида қарама-қарши йўналишга чиқиб, ўз йўналишида ҳаракатланиб келаётган Isuzu автобуси билан тўқнашув содир этган.
Isuzu ҳайдовчисига кўра, енгил машина ўзидан олдиндаги автобус ва бошқа бир енгил машинани қувиб ўтмоқчи бўлган. Тўқнашувдан кейин Isuzu ҳайдовчиси рулни ўнгга буриб юбориб, дарахтга урилган. Nexia ҳайдовчиси оғир тан жароҳати билан шифохонага етказилган, бироқ кўрсатилган ёрдамга қарамай, у вафот этган.
Қибрайда икки автобус пойга ўйнаши оқибатида улардан бири Lacetti билан тўқнашиб кетди
2022 йил 11 апрель куни Тошкент вилояти Қибрай шаҳрида Isuzu ва Lacetti автотранспорт воситалари ўртасида тўқнашув содир бўлган. Қайд этилишича, соат 14:30 атрофида 2-автобус саройи филиали ҳайдовчиси Х.У Isuzu автобусини 199-йўналишда Қибрай шаҳри Алишер Навоий кўчаси бўйлаб бошқариб бораётиб, Makro дўкони қаршисида Lacetti автомобили билан тўқнашган. Бунда жароҳат олганлар йўқ.
Ҳолат юзасидан хизмат суриштируви ўтказилганда ҳайдовчи Х.У 2-автобус саройи филиали ҳайдовчиси А.Ф. бошқарувидаги бошқа бир автобус билан ўзаро пойга ўйнагани аниқланган. Йўловчилар ва бошқа йўл ҳаракати иштирокчилари ҳаётини хавф остига қўйгани учун ҳар икки ҳайдовчи билан филиал ўртасида тузилган меҳнат шартномалари бекор қилинган. ЙТҲ ҳақидаги хабарда автобусга етказилган зарар айбдор ҳайдовчи томонидан ўрнатилган тартибда ундирилиши айтилган.
Изоҳ (0)