20 апрель куни Олий Мажлиси Сенати кенгашининг мажлиси бўлиб ўтди. Уни Сенат раиси Танзила Норбоева олиб борди, деб хабар беради парламент юқори палатаси матбуот хизмати.
Мажлис Сенатда доимий асосда ишловчи сенаторлар ҳудудларда ўрганишлар олиб бораётгани туфайли онлайн шаклда ўтказилган. Унда Олий Мажлис Сенатининг йигирма бешинчи ялпи мажлисини 2022 йил 28 апрель куни чақириш тўғрисида қарор қабул қилинган.
Видеоконференцалоқа шаклида икки кун давом этадиган ялпи мажлисда бир қатор масалалар кўриб чиқилиши назарда тутилган. «Почта алоқаси тўғрисида»ги, «Ичимлик суви таъминоти ва оқова сувларни чиқариб юбориш тўғрисида»ги, «Қўриқлаш фаолияти тўғрисида»ги, «Халқаро тижорат арбитражи тўғрисида»ги қонун қабул қилингани муносабати билан Ўзбекистоннинг айрим қонун ҳужжатларига ўзгартиш ва қўшимчалар киритиш ҳақидаги, «Кўп квартирали уйларни бошқариш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунлар шулар жумласидандир.
Шунингдек, сенаторлар томонидан 2022–2026 йилларга мўлжалланган Янги Ўзбекистоннинг тараққиёт стратегиясини «Инсон қадрини улуғлаш ва фаол маҳалла йили»да амалга оширишга оид давлат дастурининг 2022 йил I чорагидаги ижроси якунлари бўйича Вазирлар Маҳкамасининг ҳисоботи муҳокама қилинади. Сенаторлар бош вазир ўринбосари Шуҳрат Ғаниевнинг фермер хўжаликлари фаолияти кафолатларини таъминлаш ҳолати юзасидан ахборотини ҳам эшитади.
Ялпи мажлисда Ҳисоб палатаси, Марказий банк, бош прокурорнинг 2021 йилдаги фаолияти тўғрисидаги ҳисоботлари, болалар масалалари бўйича миллий комиссия ҳамраисининг ўтган давр мобайнидаги фаолияти юзасидан ахбороти эшитилади.
Шу билан бирга, адлия вазирининг 2021 йилда ҳуқуқий тарғибот ва маърифатнинг ҳолати ҳақидаги ахбороти, шунингдек, қонунларнинг ижроси ҳолати, ҳуқуқни қўллаш амалиётини ўрганиш ва қонуности ҳужжатларининг қабул қилиниши юзасидан амалга оширилган мониторинг натижалари кўриб чиқилади.
Ялпи мажлисда Андижон вилояти ҳокимининг ижтимоий ҳимояга муҳтож аҳолини ҳар томонлама қўллаб-қувватлаш, унинг даромадини ошириш, камбағалликни қисқартириш борасидаги ишлар ҳақидаги ҳисоботини ҳам эшитиш назарда тутилган.
Эслатиб ўтамиз, Сенатнинг 24-ялпи мажлиси 17 март куни бўлиб ўтган ва унда Танзила Норбоева тазйиққа учраётган аёллар ҳақида фикр билдирганди. Мажлисда ички ишлар вазири Пўлат Бобожонов сенаторларга берган ахборотида зўравонликка учраётган аёллар ва уларга берилаётган ҳимоя ордерлари ҳақида маълумот берган эди.
Изоҳ (0)