Шавкат Мирзиёев 15 апрель куни ўтказилган видеоселектор йиғилишида ер ресурсларидан самарали фойдаланиш орқали озиқ-овқат маҳсулотларини кўпайтириш бўйича топшириқлар берди.
Президент матбуот котибининг маълум қилишича, йиғилишда дунёда содир бўлаётган воқеалар сабаб жаҳон бозоридаги озиқ-овқат маҳсулотлари нархлари ўтган асрнинг 80 йилларидагидан ҳам юқори даражаларда ўсаётгани таъкидланди.
Хусусан, март ойида дунё бўйича озиқ-овқат нархлари 2021 йилнинг мос даврига нисбатан 34 фоизга ошди. Айниқса, йил бошидан жаҳон бозорларида буғдой нархи — 20 фоиз, маккажўхори — 19 фоиз, озуқа донлари — 20 фоиз ва ўсимлик ёғи — 23 фоизга кўтарилди.
Йиғилишда мавжуд ер ресурсларидан самарали фойдаланиб, 2022 йилда 7,7 миллион тонна буғдой ҳамда 23 миллион тонна мева-сабзавот етиштириб, 1,5 миллиард доллар экспортни таъминлаш зарурлиги таъкидланди. Озиқ-овқат маҳсулотларини кўпайтириш учун янги қўшилаётган 300 минг гектардан зиёд ер майдонларидан самарали фойдаланиш лозимлиги айтилди.
«Ҳозирги кунда 80 минг гектар пахта ва ғалла майдонлари қисқартирилиб, 254 минг нафар аҳолига очиқ танлов асосида берилди. Бу — озиқ овқат етиштириш учун ҳар бир туманда қўшимча 500 гектар экин майдони, дегани. Бу ислоҳотни ўз вақтида ва тўғри бошлаганимизни ҳаётнинг ўзи кўрсатмоқда. Шунинг учун бу ерлар фақат ва фақат озиқ-овқат маҳсулотлари етиштириш учун база бўлиши шарт», — деган президент.
Мутасаддиларга икки ҳафта муддатда:
- ҳосилдор уруғ навларини жойларга етказиб, дала ярмаркаларини ўтказиш;
- ер майдонларида «бир контур – бир маҳсулот» тамойили асосида экинлар экишни ташкил қилиш;
- маҳсулотни кафолатли харид қилиш бўйича шартномалар тузиш ишларини жадал ташкил қилиш топширилди.
«Лекин барча ҳудудларда ҳам ишлар аҳволини қониқарли деб бўлмайди. Андижон, Бухоро, Наманган, Самарқанд, Сурхондарё, Сирдарё ва Хоразмда суст кетяпти», — дея танқид қилган давлат раҳбари.
Хабарда айтилишича, Қишлоқ хўжалиги вазирлигига ҳокимликлар билан бирга бир ҳафта муддатда 135 минг гектар оборотдан чиққан ерларни ўзлаштириш ва уларда озиқ-овқат маҳсулотларини жойлаштириш ишларини бошлаш вазифаси қўйилди. Ушбу тадбирларни амалга ошириш учун республика бюджетидан 170 миллиард сўм ажратилади.
Президент томорқа хўжаликларидан самарали фойдаланиш масаласига тўхталиб, Фарғона, Наманган, Андижон ва Самарқанддан 600 нафар тажрибали томорқа эгалари Қорақалпоғистон, Бухоро, Қашқадарё, Навоий, Сирдарё, Хоразм ва Тошкент вилоятига бориб, 1,5 мингта маҳаллада аҳоли томорқаларида экинларни тўғри экишни ўргатаётганини мисол қилиб келтирди. Бу тажрибани 2,5 мингта маҳаллада жорий этиш вазифаси қўйилди.
Изоҳ (0)