Ҳайдовчининг огоҳлантиришига қарамай хавфсизлик камари тақмаган олд ўриндиқдаги йўловчи жаримага тортилиши мумкин. Бу ҳақда 15 апрель куни бўлиб ўтган давра суҳбатида Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати (ИИВ ЖХД ЙҲХХ) бошлиғи ўринбосари Эрали Бозоров маълум қилди, дея хабар бермоқда «Дарё» мухбири.
Эрали Бозоровнинг айтишича, ҳайдовчи йўловчини камар тақишини айтиб огоҳлантириши зарур.
«Ҳайдовчи мажбуриятларида белгиланганки, у автомобиль олд ўриндиғидаги йўловчига камар тақишини айтиб огоҳлантириши керак. Ҳозирда ‘Маъмурий жавобгарлик тўғрисида’ги кодексга ўзгартиришлар киритилмоқда. Унга кўра, агар ҳайдовчи йўловчини камар тақиши кераклиги тўғрисида огоҳлантирган бўлса-ю, у буни бажармаса, йўловчига нисбатан жарима қўлланади», — деди ташкилот расмийси.
Мулоқотда ИИВ ЖХД ЙҲХХ бўлим бошлиғи Мурод Шералиев ҳукуматнинг 12 апрелда янги таҳрирда қабул қилинган «Йўл ҳаракати қоидаларини тасдиқлаш тўғрисида»ги қарори билан хавфсизлик камари тақмаслигига рухсат берилган шахслар масаласига тўхталди.
«Қарор асосида автомобиль олд ўриндиғида ўтирган хомиладор аёллар ва беморларга хавфсизлик камари тақмасликка рухсат берилган. Аммо орқа ўриндиқ бўш бўлса, беморни ўша ерга ўтказиш керак. Агар бемор олд ўриндиқда ўтирган бўлса, йўл-патруль хизмати ходими ундан тиббий маълумотнома талаб қилиши мумкин. Бемор ўзининг касаллигини исботлаш учун бундан бошқа чора йўқ. Ҳозирдан бундай талаб қўйилмаса, ҳамма фуқаролар машина олдига ўтирволиб, ‘мен касалман’, деб баҳона қилишлари мумкин. Яна камар тақмаслик, йўл ҳаракати қоидаларига бўйсунмаслик бошланади», — деди бошқарма вакили.
Эрали Бозоров бунга қўшимча равишда қандай турдаги беморларга олд ўриндиқда ўтирса-да, хавфсизлик камари тақмасликка рухсат берилишини айтди.
«Йўл ҳаракати қоидаларини ишлаб чиқишда Соғлиқни сақлаш вазирлиги мутахассислари ҳам иштирок этди. Вазирлик томонидан 8 та касаллик рўйхати келтирилган бўлиб, улардан бири билан оғриганларга хавфсизлик камари тақмасликка рухсат берилади. Хусусан, Ўмров ва тўш суяклари, елка камари синган (гипсда бўлса), ўпка сурункали касалликларининг 4-босқичидаги беморларга, бронхиал астма, ўпканинг жиддий зарарланиши, ўпканинг бир қисми олиб ташланган бўлса, сурункали юрак етишмалигининг 3-босқичидаги касалларга ва хомиладор айёлларга хавфсизлик камари тақмасликка рухсат берилади», — деди у.
Давра суҳбатида таъкидланишича, 2022 йилнинг 1 май кунидан эътиборан ҳайдовчилар 7—12 ёшли болаларни махсус ўриндиқларда ташишлари керак. Бу ёшдаги болаларга мухсус кичрайтирилган камар тақишлари тавсиявий норма сифватида киритилган (мажбурий эмас).
Аввалроқ Ўзбекистонда транспорт воситаси ҳайдовчиси ва унинг олдидаги йўловчига хавфсизлик камарини тақиш мажбурий тартибда белгилангани хабар қилинганди.
Изоҳ (0)