Қорақалпоғистоннинг Хўжайли туманида она ўз фарзандларига зулм ўтказиб, уларни хўрлаётгани тасвирланган видео тарқалган эди. Кейинроқ ҳолат юзасидан жиноят иши қўзғатилди. Хўжайли тумани ҳокимлигининг маълум қилишича, ҳолат юзасидан ишчи гуруҳ тузилган.
Маълум қилинишича, ушбу ҳолат Хўжайли туман ҳокимлиги ва прокуратура томонидан алоҳида назоратга олинган. «Болалар ҳуқуқларини ҳимоя қилиш ва бошқа мутасадди ташкилотлар билан ҳамкорликда ишчи гуруҳ тузилиб, кечиктириб бўлмайдиган ишлар амалга оширилмоқда. Натижаси юзасидан ижтимоий тармоқлар орқали халққа қўшимча ахборот бериб борилади», — дейилади ҳокимлик муносабатида.
Аввалроқ болаларини калтаклаган аёл Қорақалпоғистон ИИВ ходими билан суҳбатда бу ишни нима сабабдан қилганини сўзлаб берганди. «Қизларимни уриб видеога олганим сабаби эрим Россияда эди, мен фарзандларим билан бирга ёлғиз яшардим. Видеони юбориб, укалари, балки, келиб қарашар деган мақсадда юбордим, йўқ, барибир келишмади. Ўртада ота-онам касал бўлди, шок ҳолатда эдим. Қизларимни урганимдан пушаймонман», — деган у.
Изоҳ (0)