«Тадбиркорлик муҳитини яхшилаш ва хусусий секторни ривожлантириш орқали барқарор иқтисодий ўсиш учун шарт-шароитлар яратиш борасидаги навбатдаги ислоҳотлар тўғрисида»ги президент фармони имзоланди. Ҳужжат матни ЎзАда эълон қилинди.
Қайд этилишича, иқтисодиётда рақобатни таъминлаш, тадбиркорлик субъектларига тенг шароитлар яратиш, бозор муносабатларига тўлақонли ўтишни жадаллаштириш, миллий иқтисодиётнинг рақобатбардошлигини ошириш, хусусий инвестициялар ҳажмини кескин ошириш ҳамда бизнес доираларнинг ишончини мустаҳкамлаш мақсад қилинган. Шу сабаб 2022 йил 1 августга қадар халқаро молия институтлари билан биргаликда Тошкент шаҳар жамоат транспорти тизимини 2025 йилгача ривожлантириш концепцияси доирасида жамоат транспорти фаолиятига хусусий секторни, жумладан, давлат-хусусий шериклик шартлари асосида лойиҳаларни амалга оширишга жалб этиш бўйича таклифлар ишлаб чиқилиб, Вазирлар Маҳкамасига киритилади.
Вазирлар Маҳкамаси 2022 йил 1 декабрга қадар Тошкент шаҳри мисолида Нукус шаҳри ва барча вилоятлар марказларида жамоат транспорти инфратузилмасини ривожлантириш стратегиясини ишлаб чиқиб, жорий этишни бошлайди.
Эслатиб ўтамиз, 2022 йилнинг май ойигача Тошкент автобуслари кондуктор иштирокисиз нақд тўловни онлайн қайд қилиш тизими билан жиҳозланади. Таъкидланишича, хизмат кўрсатиш сифатидан келиб чиққан ҳолда жамоат транспортини молиялаштиришнинг янги тизимига ўтиш президент қарори билан кўзда тутилган.
Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. Унда Тошкентдаги жамоат транспорти юзасидан масъул мутасаддиларни танқид қилган: «6 ойликда нима қиламиз, 3 ойликда нима қиламиз, йил якунида-чи? Юринг президент, автобусга мининг, деб бир маршрутни кўрсат, энг оғир ҳудудингдан бошла. Мен ҳам автобусда юришни хоҳлайман. Кўз-кўз қилиш учун эмас, одамларга хавфсиз, эркин, арзон ва сифатли транспорт керак».
Аввалроқ Тошкент жамоат транспортида ҳаракатланиш оралиқ вақти 2 баробарга қисқариши, Тошкент шаҳри жамоат транспорти учун келгуси тўрт йил давомида 1043 та янги автобус ва электробуслар сотиб олиниши хабар қилинган эди.
Изоҳ (0)