Психологик тренинглардан ҳам кўпроқ фойда берувчи 8 ажойиб фильм

Турли хил ҳаётий вазиятларга бошқача нигоҳ билан қарашни хоҳлайсизми? У ҳолда қулайроқ жойлашинг ва попкорндан кўпроқ ғамлаб олинг.

«Бошдан оёқ соҳибжамол»

АҚШ, Хитой, 2018 йил

Жанр: мелодрама, комедия

Режиссёр: Эбби Кон, Марк Силверштейн

Ролларда: Эми Шумер, Мишел Уильямс, Том Хоппер

Нозик қоматни орзу қиладиган ёқимтой, дўмбоққина қизнинг ҳаёти бир зумда остин-устун бўлиб кетади. Озишни хоҳловчи бесўнақай қаҳрамон тасодифан велотренажёрдан йиқилиб, бошини қаттиқ уриб олади. Ҳушига келган қиз бирданига идеал қоматга эга ҳақиқий соҳибжамол эканлигини тушунади. Ўзининг чидаб бўлмас даражада гўзаллигига ишонч ҳосил қилган бош қаҳрамон ҳаётини тубдан ўзгартира бошлайди. Бироқ бошқаларнинг назарида у ҳали ҳамон ўша — семиз қиз. Аммо унинг ўз гўзаллигига бўлган ишончи одамларни жалб қила бошлайди ва қаҳрамонимиз тез орада ўзини диққат марказида кўради.

«Харид васвасаси»

АҚШ, 2009 йил

Жанр: мелодрама, комедия

Режиссёр: П.Ж.Хоган

Ролларда: Айла Фишер, Хью Денси, Кристен Риттер, Жоан Кюсак

Бош қаҳрамон — сўнгги урфда кийинишга муккасидан кетган ўта замонавий қиз. Унинг дўконга ҳар бир ташрифи яна бирор нарса сотиб олиш ва бунинг ортидан оч қолмаслик истаги ўртасидаги ҳақиқий курашдир. Молиявий аҳволини назорат қила олмаслигига қарамай, қизнинг ўзи молия бўлимида журналист бўлиб ишлайди ва одамларга пулларини тежамкорлик билан бошқариш бўйича маслаҳатлар беради.

«Имконсизлик»

Испания, Таиланд, АҚШ, 2012 йил

Жанр: драма

Режиссёр: Хуан Антонио Баёна

Асосий ролларда: Наоми Уотц, Юен Макгрегор, Том Холланд

Драматик картина Таиландда 2004 йилдаги цунами пайтида содир бўлган воқеалар ҳақида ҳикоя қилади. Бедарак йўқолганларни ҳисобга олмаганда, цунами 200 мингдан ортиқ одамнинг ҳаётига зомин бўлди. Дам олиш масканига келган беш кишилик оилани ҳам табиий офат четлаб ўтмади. Уларнинг ҳар бири бир-биридан узилиб қолган ҳолда тезроқ учрашишдан умидини йўқотмайди.

«Темпл Грандин»

АҚШ, 2010 йил

Жанр: драма, биография

Режиссёр: Мик Жексон

Ролларда: Клер Дейнс, Жулиа Ормонд, Дэвид Стретейрн, Кетрин ЎХара

Биографик фильм ўзининг феъл-атвори ва қатъияти туфайли жаҳон тарихига кирган Темпл Грандин исмли аутизм касаллигига чалинган аёлнинг ажойиб тарихини ҳикоя қилади. Қишлоқ хўжалиги соҳасидаги етакчи олимлардан бирига айланган Темпл ҳар қандай одам, унинг касаллик ташхиси ва чекловларидан қатъи назар, улкан муваффақиятларга қодир эканлигини исботлай олади.

«1+1»

Франция, 2011 йил

Жанр: драма, комедия, биография

Режиссёр: Оливиэр Накаче, Эрик Толедано

Бош ролларда: Француа Клюзе, Омар Си, Анн Ле Ни

Таъсирли фильм характер жиҳатидан қарама-қарши бўлиб кўринувчи икки кишининг ҳақиқий дўстлиги ҳақида ҳикоя қилади. Бой ва аристократ Филипп умрининг қолган кунларини ногиронлар аравачасида ўтказишга мажбур бўлади. У ўз ҳаётини осонлаштириш учун ёрдамчи ёллайди — бу иш собиқ маҳбус Дрисс учун умуман мос эмасди. Иккисини ҳам ҳайратда қолдиргани шуки, айнан Дрисс Филиппнинг ҳаётга ижобий қарашини тиклай олади ва унга саргузашт руҳини киритади.

«Бахт ортидан қувиб»

АҚШ, 2006 йил

Жанр: драма, биография

Режиссёр: Габриэле Муччино

Бош ролларда: Уилл Смит, Жейден Смит, Тандив Нютон

Драма беш ёшли ўғлини тарбиялаётган ёлғиз ота ҳақида. Маошдан маошгача зўрға кун кўрадиган бош қаҳрамон молиявий қийинчиликларга дош бериши лозим. Бир сафар квартира ижарасини тўлай олмаган қаҳрамонлар уйдан ҳайдаб юборилади. Энди ота фарзандининг келажагини таъминлаш учун қийин йўлни босиб ўтиши керак.

«Пининг ҳаёти»

АҚШ, Тайван, Буюк Британия, 2012 йил

Жанр: Фантастика, Драма, Саргузашт

Режиссёр: Энг Ли

Ролларда: Сураж Шарма, Ирфон Хон, Аюш Тандон

Рангли ва жонли фильм ҳинд ҳайвонот боғи директорининг ўғли Пи ҳақида ҳикоя қилади. Қаҳрамоннинг оиласи кўчишга мажбур бўлади ва янги уйга кетаётиб, кемада ҳалокатга учрайди. Пи ҳушига келгач, омон қолганини тушунади ва қайиқда сузиб юради. Бироқ унинг қайиқдаги қўшнилари йўлбарс, гиена, зебра ва орангутан эди. Энди бола ёввойи ҳайвонлар орасида омон қолиши керак.

«Одамлардан йироқда»

АҚШ, 2000 йил

Жанр: драма, романтика, саргузашт

Режиссёр: Роберт Земекис

Ролларда: Том Хенкс, Хелен Хант, Крис Нот, Ник Сирси

Оддий бир меҳнаткаш кишининг ҳаёти одатдагидек давом этаётганди: тез орада севгилиси билан турмуш қуради, иш ва доимий маиший муаммолар. Қаҳрамоннинг навбатдаги хизмат сафари унинг ҳаётини бутунлай ўзгартириб юборади: самолёт тўсатдан қулаб тушади ва биргина бош қаҳрамон омон қолишга муваффақ бўлади. Ўзини кимсасиз оролда кўрган қаҳрамон бир неча йил давомида ҳар куни омон қолиш учун курашиши керак бўлади.