Фарғона вилоятининг Учкўприк туманида яшовчи 31 ёшли Гуласал Собирова сурункали буйрак етишмовчилигидан азият чекарди. Турмуш ўртоғининг ҳаётини сақлаб қолиш учун Дилшод Собиров хотинига донорлик қилди. Бу ҳақда «Дарё» мухбири Азизжон Эрматов хабар берди.
Олти соатдан ортиқ давом этган жарроҳлик амалиёти муваффақиятли ўтган бўлиб, ҳозирда беморларнинг аҳволи яхши.
«Республика шошилинч тиббий ёрдам илмий маркази Фарғона филиалида икки нафар беморда илк бор аорта–коронар шунтлаш жарроҳлик амалиёти ўтказилган эди. Бу сафар эса пойтахтдан келган мутахассислар — Республика шошилинч тиббий ёрдам илмий марказининг хирургия бўлими раҳбари, тиббиёт фанлари доктори, профессор Фарҳод Ҳожибоев раҳбарлигидаги 12 кишилик гуруҳ ҳамда марказнинг Фарғона филиали шифокорлари иштирокида буйрак кўчириб ўтказиш амалиёти ўтказилди», — дейди филиал директори Абдуқаюм Тўхтақулов.
Вилоятда бугунги кунда сурункали буйрак етишмовчилиги билан оғриган беморнинг 260 нафари доимий равишда гемодиализатор аппарати орқали муолажа олмоқда. Ҳозирда олтмишга яқин беморлар буйрак кўчириш амалиётини ўтказишга муҳтож.
Изоҳ (0)