Россия биринчи бор еврооблигацияларни рублда тўлади. Бу дефолт сифатида тан олиниши мумкин

Россия биринчи марта рублда деярли 650 млн долларлик еврооблигацияларни тўлади. Бу ҳақда «Forbes.ru» хабар бермоқда.

Россия Молия вазирлиги маблағларни миллий ҳисоб-китоб депозитарийсига ўтказди. Бунга хорижий вакиллик банкининг кўрсатмаларни бажаришдан бош тортгани сабаб бўлди. Халқаро рейтинг агентликлари аввалроқ хорижий валютадаги тўловларни назарда тутувчи еврооблигациялар бўйича рублдаги тўловларни дефолт сифатида кўришини маълум қилган эди. 

Россия Молия вазирлиги купон даромадининг номинал қийматини тўлаш учун рублдаги маблағларни ўтказди, деб хабар қилди вазирлик матбуот хизмати. Миллий ҳисоб-китоб депозитарийсига маблағлар 4 апрелда ўтказилган.

Аввалроқ Fitch агентлиги Россиянинг доллардаги рубль облигациялари бўйича фоизларни тўлаши 30 кундан кейин дефолтни англатиши ҳақида огоҳлантирган эди.

Қарз мажбуриятларини бажариш билан боғлиқ қийинчиликлар ва дефолт таҳдиди Ғарб давлатларининг Украинадаги урушга жавобан Россияга қарши санкциялари туфайли юзага келди. 

Санкциялар, бошқа нарсалар қаторида, Россия банкини халқаро захираларга кириш ҳуқуқидан маҳрум қилди. Россия президенти Владимир Путин ўзининг 6 мартдаги фармони билан Россияга «нодўстона» бўлган мамлакатлар кредиторлари олдидаги валюта мажбуриятларини рублда тўлашга рухсат берди. 

Молия вазири Антон Силуановнинг таъкидлашича, ҳозирги вазиятда ушбу облигацияларни рублда тўлаш қарз олувчи томонидан мажбуриятларнинг бажарилиши ҳисобланади.

Аввалроқ Fitch Россия суверен кредит рейтингини бекор қилгани ҳақида хабар берилган эди.