Сирдарё вилояти Гулистон шаҳрида 2 апрель куни жамоат транспорти бўлган автобусни маст ҳолда бошқарган ҳайдовчига чора кўрилди. Бу ҳақда Йўл ҳаракати хавфсизлиги хизмати хабар берди.
Қайд этилишича, шу куни соат 15:30 ларда Гулистон шаҳар ҳудудида хизмат олиб бораётган ЙПХ ходимлари қарама-қарши ҳаракатланиш учун мўлжалланган томонга чиқиб келаётган Isuzu автобуси ҳайдовчисини тўхтатган. Текширув давомида ҳайдовчидан спиртли ичимлик ҳиди келгани сабаб ходимлар уни мастлик ҳолати бўйича текширувга таклиф қилган. Текширув натижаларига кўра, ҳайдовчи О.Н. (1978 йилда туғилган) маст ҳолдалиги аниқланган.
Унга нисбатан Маъмурий жавобгарлик тўғрисидаги кодекснинг 128⁵-моддаси (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) иккинчи қисми ҳамда 131-моддаси (транспорт воситаларини маст ҳолда бошқариш) тартибида маъмурий баённома тузилган. Автобус вақтинча сақлаш учун жарима майдонига қўйилган.
Эслатиб ўтамиз, 9 март куни Тошкент шаҳрида автобус 70 ва 5 ёшли фуқароларни уриб юборганди. ЙТҲ оқибатида 70 ёшли пиёда шифохонада вафот этган. 5 ёшли бола эса «бош соҳаси лат ейиши» ташхиси билан шифохонага ётқизилган. «Тошшаҳартранс» ҳолат юзасидан расмий маълумот берган:
«Ҳайдовчи С.М. автобусни Чилонзор кўчаси бўйлаб бошқариб кетаётганида йўлда тўхтаб қолган енгил автомобиль билан тўқнашиб кетмаслик мақсадида автобусни кескин ўнгга бурган. Оқибатда йўл четида турган 2 нафар пиёдани уриб юборган».
Изоҳ (0)