Рамазон ойи муносабати билан Ўзбекистон мусулмонлари идораси Фатво марказидаги Call-марказ 24 соатли режимга ўтказилди. Бу ҳақда диний идора матбуот хизмати хабар берди.
Маълум қилинишича, Мусулмонлар идораси Фатво маркази ташаббуси билан Рамазон ойида мўмин-мусулмонларнинг телефон орқали йўлланган рўза тутиш билан боғлиқ барча шаръий масалаларга уламоларнинг тун-у кун жавоб бериш тизими жорий этилган.
Мўмин-мусулмонлар 2 апрелдан 2 майга қадар ҳафтада етти кун, 24 соат давомида ўзларининг рўза тутиш билан боғлиқ шаръий саволларига жавоб олишлари мумкин бўлади (ибодат вақтларидан ташқари).
Бунинг учун 24 соат давомида қуйидаги телефон рақамига қўнғироқ қилиш тавсия этилади: 78-150-33-44.
Ўзбекистонда Рамазон ойи 2 апрелдан бошланди. Ўзбекистон мусулмонлари идорасининг «Қуръон ва тажвидни ўргатиш» бўлими томонидан 1443/2022 йил Рамазон ойида Тошкент шаҳри масжидларида таровиҳ намозларида ўқиладиган хатми Қуръоннинг кунлик тақсимоти белгиланган. Унга кўра, хатми Қуръон апрелнинг биринчи кунидан бошлаб, 27 сана – Қадр кечасида якунланиши мўлжалланмоқда.
Изоҳ (0)