Соғлиқни сақлаш вазирининг буйруғига асосан тиббиёт ходимларига ҳижоб ва бошқа диний кийим-бошларда юриш бўйича тақиқ олиб ташланди. Бу ҳақда вазирнинг «Тиббиёт ходимларининг одоб-ахлоқ кодексини тасдиқлаш ҳақида»ги буйруғига таяниб, Олий Мажлис Қонунчилик палатаси депутати Расул Кушербаев маълум қилди.
Маълум қилинишича, соғлиқни сақлаш вазирининг 2016 йил 20 январдаги 34-буйруғига асосан тиббиёт ходимлари ҳижоб ва бошқа диний кийим-бошларда юришлари тақиқланган эди. Беҳзод Мусаевнинг буйруғи билан 6 йилдан бери амалда бўлган ушбу буйруқ бекор қилинган.
Кушербаев Ўзбекистоннинг амалдаги қонунларида фуқароларга ҳижоб ва бошқа диний кийимларда юриш бўйича чекловлар мавжуд эмаслигини эслатиб ўтган.
Маълумот учун, тиббиёт ходимларининг одоб-ахлоқ кодексининг мақсади тиббиёт ходимлари томонидан ҳуқуқбузарликлар содир этилишининг олдини олиш, улар содир этилишининг сабаб ва шарт-шароитларини бартараф этиш, тиббиёт муассасаси раҳбар ва ходимларини юксак ҳуқуқий онг, Ўзбекистон Конституцияси, қонунлари ва бошқа норматив ҳуқуқий-ҳужжатларига, фуқароларнинг ҳуқуқ ва эркинларига қатъий риоя қилишини мутахассислар руҳига сингдиришни таъминлашдан иборат.
Эслатиб ўтамиз, 2021 йилнинг сентябридан бошлаб Ўзбекистонда ўқувчи қизларнинг мактабга рўмол ўраб келишига рухсат берилган.
Изоҳ (0)