«Манчестер Юнайтед» ёзда Ҳарри Кейн билан шартнома имзоламоқчи.
The Athletic’нинг хабарига кўра, манкунианликлар ҳужум чизиғини кучайтиришни асосий мақсад қилиб олган. «Тоттенҳэм» ҳужумчиси номзодлар ичида энг маъқули бўлиб турибди.
Бир йил олдин «қизил иблислар»нинг собиқ вице-президенти Эд Вудворд «шпорлар» президенти Дэниэл Леви билан Кейн масаласида музокара ўтказганди. Ўша вақтда ҳужумчига «Манчестер Сити» ҳам қизиқиш билдираётганди. «Манчестер Юнайтед» 73 миллион фунтга Жейдон Санчо трансферини амалга оширганидан сўнг, Кейнни харид қилишнинг имкони бўлмади ва шунда Вудворд англиялик ҳужумчини 2022 йилда олиб келиш мумкинлигини маълум қилганди.
Ҳаррининг позицияси қатъий, унинг «шпорлар» билан шартномаси 2024 йилда ўз ниҳоясига етади. Ҳужумчи шартномани узайтиришни хоҳламаётгани ҳисобга олинса, «Тоттенҳэм» унинг трансферидан катта пул ишлаб олиш учун шу ёзда сотиб юбориши керак бўлади. Хабарларга кўра, ёзда 29 ёшга кирадиган футболчининг трансфер нархи 100 миллион фунт бўлиши мумкин.
«Манчестер Юнайтед» янги мураббий борасида бир тўхтамга келмаган, аммо бу масалани ҳам тезроқ аниқлаштириб олмоқчи. Трансферлар билан шуғулланиши учун мавсум сўнгига қадар мураббийни ҳам тайинламоқчи. Раҳбарият янги мураббий ким бўлишидан қатъи назар Ҳарри Кейн трансферини амалга ошириш истагида.
Кейн жорий мавсум «Тоттенҳэм» сафида барча мусобақаларда 41 та ўйинда майдонга тушиб, 22 та голга муаллифлик қилди.
Изоҳ (0)