Чемпионлар Лигасида иштирокчиларни танлаш тамойили бўйича ўзгаришлар бўлиши мумкин.
The Guardian хабарига кўра, УЕФА рейтингида юқори ўринларда бўлган икки жамоа ҳам нуфузли мусобақага йўл олади. Европа клублар ассоциацияси аъзолари янгича ёндашувни қўллаб-қувватламоқда.
Бунда ўз миллий чемпионатида Чемпионлар Лигасига йўлланма берадиган ўринни қўлга кирита олмаган жамоалар УЕФА рейтинги бўйича лицензияга эга бўлади. Бироқ бу жамоа даражаси пастроқ Еврокубокларга (Европа Лигаси, Конференциялар Лигаси) йўлланма берувчи ўринни эгаллаган бўлиши ёки мамлакат Кубогини қўлга киритган бўлиши керак. Уларнинг сўнгги беш мавсумдаги кўрсаткичлари инобатга олинади. Рейтинг шу тарзда ҳисобланади.
Бу қандай ишлайди?
Барчаси оддий: клубларнинг УЕФА рейтингидаги сўнгги беш мавсумда жамғарган «евроочко»ларига қараш керак бўлади. Ўтган мавсум натижаларига кўра Чемпионлар Лигаси гуруҳ босқичига чиқа олмаган рейтингнинг энг яхши икки жамоаси гуруҳ босқичи учун йўлланмани қўлга киритади.Бу нега керак? УЕФА ўз миллий чемпионатида омадсизликка учраган топ-жамоаларнинг нуфузли мусобақада иштироксиз қолишини хоҳламаяпти. Шу билан бирга мамлакат чемпионатида ўнинчи ўрин ва ундан пастдаги ўринларда жойлашган жамоаларнинг йўлланма учун курашиши имконсиз бўлади — янги регламентга кўра, ҳеч бўлмаганда Европа Лигаси ёки Конференциялар Лигасига йўлланма берувчи ўринларда чемпионатни якунлаган ёки мамлакат Кубогини қўлга киритган жамоаларда имконият бўлади.
Бу кимларга ёрдам беради?
Ҳозирча аниқ эмас, аммо жамоаларнинг айни вақтдаги ўрнига қараб, тасаввур ҳосил қилиш мумкин. Топ-5 лигалардаги Чемпионлар Лигаси йўлланмасидан узоқда бўлиб турган жамоаларни ўрганиб чиқиш мумкин.Йўлланмалардан бири албатта «Манчестер Юнайтед»га (ҳозирда АПЛда 6-ўринда) берилган бўларди. Ралф Рангник жамоаси УЕФА рейтингида 9-ўринни эгаллаб турибди ва қолган таъқибчиларидан анча ўзиб кетган.
«Рома» ва «Тоттенҳэм» 20 очко ортда. Уларнинг ортидан «Аталанта» бормоқда. «Лион» рейтингда «Аталанта»дан юқорида турган бўлса ҳам, янги қоида бўйича йўлланма учун кураш олиб боролмайди. Чунки француз клуби миллий чемпионатда 10-ўринни эгаллаб турибди.
УЕФА Еврокубоклар регламентини ўзгартирган эди
УЕФА Еврокубокларга 2024 йилдан бошлаб амалга киритиладиган ўзгаришларни эълон қилганди.Унга кўра, Чемпионлар Лигасида ҳозиргидек 32 эмас, 36 та клуб иштирок этади. Гуруҳ босқичи ўрнида битта лига ташкил этилади. Лигада дастлабки 8 ўринни эгаллаган жамоа плей-офф босқичига йўл олади. Қолганлар эса қўшимча плей-офф орқали сараланади. Барча клублар камида 10 тадан ўйин ўтказади ва шунга яраша даромадлар ошади.
Қўшимча ўринлардан бирига УЕФА рейтингида бешинчи ўринни эгаллаб турган лиганинг учинчи жамоаси эга чиқади. Яна битта йўлланма эса Чемпионлар йўли саралаш босқичидан муваффақиятли ўтган миллий чемпионат ғолибларидан бирига насиб этади. Яъни бундай йўлланмалар сони тўрттадан бештага кўпаяди.
Сўнгги иккита йўлланма эса юқорида таъкидланганидек, Европа Лигаси ёки Конференциялар Лигасига йўлланма берувчи ўринни эгаллаган ёки мамлакат Кубогида зафар қучган, сўнгги беш йилдаги натижалари бўйича УЕФА клублар рейтингида энг юқори ўринда турган иккита жамоага насиб этади.
Регламентни ўзгартириш масаласи аллақачон махсус ишчи гуруҳ томонидан муҳокама қилинган ва келгуси ҳафта УЕФА бош ассамблеясида бу мавзу кўтарилиши мумкин.
Изоҳ (0)