Иқтисодий тадқиқотлар ва ислоҳотлар маркази томонидан баҳоланган Ишбилармонлик фаоллиги индекси (ИФИ) 2022 йил февраль ойида 1085 бирликни ташкил этиб, январь ойига нисбатан 8,5 фоизга ошди.
Шунингдек, ишбилармонлик фаоллиги индексида ўтган йилнинг мос даврига нисбатан эса 33 фоизлик ўсиш қайд этилди. Бу ҳақда марказ матбуот хизмати «Дарё»га маълум қилди.
2022 йилнинг февраль ойида Ишбилармонлик фаоллиги индекси ўтган ойга нисбатан 8,5 фоизга ошиб, 1085 бирликни ташкил этиши, қуйидаги компонентлар даражасидаги ўзгаришларга боғлиқ бўлган:
- Компаниялар банк ҳисоб варақаларидаги операциялар сони 16,5 фоизга ошган;
- Фаолият кўрсатаётган компаниялар бўйича компонент 2,9 фоизга ошган;
- Товар-хом ашё биржасида хом ашё сотиб олиш жадаллиги 6,0 фоизга ошган;
- Товар белгилари бўйича компонент 9,6 фоизга камайган.
2022 йил февраль ойида Ишбилармонлик фаоллиги индекси 12 та ҳудудда ўтган ойга (2022 йил январь) нисбатан ўсиш кузатилган.
Хоразм (70,4 фоиз), Наманган (46,9 фоиз), Сурхондарё (46,0 фоиз) ва Жиззах (23,7 фоиз) вилоятларида сезиларли даражада ўсиш кузатилган.
Шу билан бирга, ушбу индекс 2 та ҳудудда камайган. Хусусан, Тошкент (-1,9 фоиз) ва Андижон (-0,7 фоиз) вилоятларида ўтган ойга нисбатан пасайиш кузатилган.
Банк ҳисоб варақалари бўйича операциялар
2022 йил февраль ойида банклараро тўлов операциялари сони 4 964,6 минг тани ташкил этди ва ўтган ойга нисбатан 703,6 минг транзакцияга (16,5 фоиз) ошган.
Банклараро тўлов операциялари сони барча ҳудудларда ўсган.
2022 йил февралда республиканинг барча ҳудудларида юридик шахслар ўртасидаги банк операциялари сони ўтган ойга нисбатан ошган.
Хусусан, сезиларли даражадаги ўсиш Навоий (23,1 фоиз), Қашқадарё (19,5 фоиз), Самарқанд (19,3 фоиз) вилоятларида ва Тошкент шаҳрида (18,7 фоиз) кузатилган.
Товар-хом ашё биржасидаги фаоллик
2022 йилнинг февраль ойида ИФИнинг биржа компоненти 10 599 бирликни ташкил этди. Бу эса ушбу компонентнинг ўтган ойга нисбатан 6,0 фоизга ўсганлигини англатиб, битимлар сонининг (9,6 фоиз) ошганлиги билан изоҳланади.
Республика товар-хом ашё биржасида товарлар савдоси умумий айланмаси ҳажми 2022 йил февраль ойида 6 273,6 млрд сўмни ташкил этиб, ушбу кўрсаткич ўтган ойга нисбатан 14,4 фоизга ошган.
Компаниянинг фаоллиги
Фаолият юритаётган компаниялар бўйича компонент 2022 йил февраль ойида 10 291 бирликни ташкил этиб, ўтган ойга нисбатан 2,9 фоизга ошганлигини кўрсатади. Ушбу кўрсаткич ўтган йилнинг мос даврига нисбатан ижобий ўзгариб, 9,6 фоизга ўсган.
Февраль ойида барча турдаги фаолият юритаётган компаниялар сони ўтган ойга (577 914 бирлик) нисбатан 3 861 тага кўпайиб, 581 775 бирликни ташкил этган.
Ҳисобот даврида, кичик корхоналар сони 467 096 тадан 470 712 тагача ошган (ўсиш 3 616 та).
Фермер хўжаликлари сони 107 751 тадан 107 710 тагача (пасайиш 41 та) камайган. Йирик тадбиркорлик билан шуғулланаётган субъектлар сони 3 353 тани ташкил этиб, 2022 йилнинг январь ойига нисбатан 286 тага ошган.
Брендлари рўйхатга олиш
Бундан ташқари февраль ойида савдо белгилари муҳофазаси бўйича бизнес фаоллиги индекси 0,9043 бирликни ташкил этиб, ушбу кўрсаткич 2022 йилнинг январь ойига нисбатан 9,6 фоизга камайган. Жорий йилнинг февраль ойида юридик шахслар томонидан 312 та товар белгилари ва товар номлари рўйхатга олинган.
Ўзбекистон Республикаси ва минтақалар бўйича ИФИ компонентларининг ўтган ойга нисбатан ўзгариши
Ўзбекистон Республикаси ва минтақалар бўйича ИФИ компонентларининг ўтган йилнинг мос ойига нисбатан ўзгариши
Изоҳ (0)