АҚШ президенти Жо Байден Ғарб демократия ва автократия ўртасида кечадиган, узоқ давом этадиган курашга тайёрланиши зарурлигини қайд этди. АҚШ президентининг фикрича, Украина демократия ҳамда эркинлик учун кураш фронтининг олди чизиқларида бормоқда.
«Демократия учун кураш тугамайди ва Совуқ урушдан кейин ҳам якунига етмаган. Охирги 30 йил ичида авторитаризм бутун дунёда қайта уйғонди», — деган Байден Польшага қилган икки кунлик сафари якунлари бўйича берган ва CBS телеканали трансляция қилган баёнотда.
«Курашда яқин кунлар ёки ойлар ичида ғалаба қозониб бўлмаслигини тушуниб олиш зарур. Олдинда оғир қарама-қаршиликлар бўлишини англаб, уларга, узоқ давом этадиган жангга тайёрланиш керак», — деган АҚШ президенти.
Шунингдек, Жо Байден НАТО мудофаа альянси эканлиги, ушбу иттифоқ ҳеч қачон Россияга таҳдид қилмаганини таъкидлаган. Унинг сўзларига кўра, НАТО кенгайишга интилаётгани йўқ.
«Кремль НАТОнинг кенгайишини Россияда вазиятни беқарорлаштирадиган империалистик лойиҳа сифатида кўрсатишга уринмоқда. Ушбу гапларнинг ҳеч бири ҳақиқат эмас. НАТО — мудофаа альянси», — дея қайд этган Байден.
АҚШ президенти Польшага 25 март куни келган. 26 мартда у Польша президенти Анжей Дуда, шунингдек, Украина ташқи ишлар вазири Дмитрий Кулеба, мудофаа вазири Алексей Резников билан учрашган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)