Турли даражадаги темир танқислиги дунё аҳолисининг 80 фоизига ўз таъсирини ўтказади. Қуйида уни аниқлаш мумкин бўлган аломатлар билан танишиб чиқиш мумкин.
Темир — организмнинг меъёрда ишлаши учун зарур бўлган энг муҳим минераллардан биридир. Унинг асосий вазифаси организм аъзоларига кислород етказиб беришдир. Аммо Жаҳон соғлиқни сақлаш ташкилоти маълумотларига кўра, дунё аҳолисининг 80 фоизида темир танқислиги турли хил даражада кузатилади. Албатта, анемия кузатилмаса ҳам қизил қон таначалари даражаси тушиб кетади. Ушбу етишмовчиликни намоён қиладиган бир нечта яширин аломатлар мавжуд.
Кутилмаган ўзгаришлар
Чанг, лой, крахмал, картон ва ҳатто баъзи тозалаш воситалари темир танқислиги бўлган одамлар учун тўсатдан жуда ёқимли кўриниши мумкин. Тўғри, буни кузатиш жуда қийин: одатда бундай қарамликлар ҳомиладор аёлларда ёки ёш болаларда пайдо бўлади ва бошқалар эса бу каби ғалати одатларга эътибор бермайди. Аммо инсон бунинг устидан назорат ўрнатиши ва вақтида шифокорга мурожаат қилиши зарур.
Тирноқлар шаклида ўзгариш ва мўртлашув
Мўрт тирноқлар нафақат кальций, балки темир етишмаслигидан ҳам дарак беради. Яна бир ўзига хос белги — тирноқ пластинкасининг шакли ўзгариши. Агар шунга ўхшаш ҳолат кузатилса, шифокорга кўриниш ва темир даражасини текширтириш керак.
Лабнинг қуриши ва ёрилиши
Қуруқ ва ёрилиб кетган лаблар ички ёки ташқи ҳавонинг қуруқлиги, шунингдек, қуёшнинг узоқ вақт таъсир қилиши натижасида пайдо бўлиши мумкин. Аммо лаб бурчакларида гапириш ёки кулишни қийинлаштирадиган ёриқлар пайдо бўлса, бу темир етишмаслиги билан боғлиқ бўлиши мумкин.
Безовта оёқ синдроми
Шифокорлар безовта оёқ синдромига нима сабаб бўлишини аниқ билмайди, бу ҳолат оёқнинг пастки қисмида доимо оғриқ, уюшиш ёки томир тортишиш билан кузатилади. Аммо 2013 йилги тадқиқот темир танқислиги бўлган одамларда ушбу синдромга тўққиз баравар кўпроқ мойил эканлигини тасдиқлади.
Тилнинг шишиши
Глоссит — бу тилнинг шишиши ва оғриқли бўлиши. Тил шунчалик шишадики, юзадан кичик сўрғичлар йўқолади ва бутунлай силлиқ ҳолга келади. Ушбу ҳолатга ҳамроҳ оғизнинг қуриши, ачиши ва ютинишнинг қийинлиги ҳамроҳ бўлади.
Музга интилиш
Оғир темир танқислигининг энг кўп учрайдиган аломатларидан бири — муз бўлакларини сўриш учун деярли назорат қилиб бўлмайдиган истак. Мутахассисларнинг фикрига кўра, муз тилнинг шишганини тинчлантиришга ёрдам беради.
Изоҳ (0)