Ўзбекистондаги тиббиёт олийгоҳлари талабаларига шифокор бўлиб ишлашга рухсат берилади

Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтмоқда, деб хабар бермоқда «Дарё» мухбири.

Президент тиббиёт муассасаларини малакали кадрлар билан таъминлаш бўйича, янги тизим жорий этилишини маълум қилган.

2022/2023-ўқув йилидан:

• тиббиёт олийгоҳларига давлат грантлари асосида қабул квоталари, ҳудудларда шифокорларга бўлган ҳақиқий эҳтиёждан келиб чиқиб, мақсадли ошириб борилади;
• фтизиатрия, гематология, нефрология, пулмонология, психиатрия, шошилинч тиббий ёрдам, лаборатория иши, юқумли касалликлар каби 15 та тор соҳадаги мутахассислик бўйича магистратурага давлат грантлари 4 бараварга оширилади;
• 11 та тиббиёт олийгоҳида олти ойлик ихтисослашган курслар ташкил этилиб, ҳар йили 500 нафардан оилавий шифокорни ҳудудлардаги энг зарур тор соҳа мутахассислиги бўйича мақсадли ўқитиш дастури амалга оширилади.

Давлат раҳбари бакалавриат, магистратура ва клиник ординатура таълим тизими такомиллаштирилишини айтган.

«Хусусан, битирувчиларга қўйиладиган малака талаблари, эҳтиёж юқори бўлган муҳим йўналишлар бўйича, қайта кўриб чиқилади; ўқув режалари ва дастурлар, талабаларнинг билимини баҳолаш тизими халқаро стандартларга мослаштирилади; 11 та тиббиёт олийгоҳида алоҳида ўқув марказлари ташкил этилиб, улар замонавий Симуляторлар билан жиҳозланади. Бунинг учун, 250 миллиард сўм йўналтирилади», — дейди Шавкат Мирзиёев.

Бундан ташқари, тиббиёт олийгоҳларининг магистратура босқичида ва бакалавриатнинг 5–6-курсларида ўқиётган талабаларга, йўлланма асосида, бирламчи ва тез ёрдам тизимида шифокор бўлиб ишлашга рухсат берилиши таъкидланган.

Шавкат Мирзиёев, шунингдек, хориждан нуфузли мутахассислар жалб қилиниб, тиббиёт соҳасида малака ошириш тизими мутлақо янги ёндашувлар асосида тўлиқ ўзгаришини қайд этган.

«Бунда, 11 та тиббиёт олийгоҳида малака ошириш ва қайта тайёрлаш факультетлари, 23 та ихтисослашган марказларда махсус ўқув курслари ташкил этилади. Шунингдек, йирик ва нуфузли хусусий шифохоналарда тиббиёт олийгоҳларининг клиник базалари ташкил этилиб, уларга ҳам шифокор ва ҳамширалар малакасини ошириш ҳамда қайта тайёрлашга рухсат берилади. Шу муносабат билан Республика тиббий ходимлар касбий малакасини ривожлантириш ҳамда Ўрта тиббиёт ходимлари малакасини ошириш марказлари фаолияти тўлиқ қайта кўриб чиқилади», — дейди президент.

Шавкат Мирзиёевнинг таъкидлашича, «бу ташкилотлар энди фақат замонавий методикаларни ишлаб чиқиш ва жорий қилиш билан шуғулланади».

«Шу билан бирга, шифокорларнинг малака тоифасини олиш муддатлари қайта кўриб чиқилади. Бунда, тоифасиз ходимларга талаб этиладиган иш стажлари 5 йилдан 3 йилга, биринчи тоифага – 7 йилдан 5 йилга, олий тоифага – 10 йилдан 7 йилга қисқаради.

Эслатиб ўтамиз, Шавкат Мирзиёев 4 март кунги видеоселектор йиғилишида барча давлат ташкилотлари ва муассасаларида талабаларнинг ишлашига рухсат берилишини маълум қилганди. Ўшанда олийгоҳлар атрофидаги мактаб ва боғчаларда 13 минг вакант иш ўринлари мавжудлиги, камида 10 минг нафар талабани улар учун жойлашуви қулай бўлган мактаб ва боғчаларга ишга жойлаштириш мумкинлиги кўрсатиб ўтилган эди.