Расмий ташриф билан Мисрда бўлиб турган Тожикистон президенти Эмомали Раҳмонга Қоҳира университетининг «Фахрий доктори» унвони берилди. Бу ҳақда давлат раҳбарининг матбуот хизматига таяниб, Asia Plus хабар берди.

Қайд этилишича, Эмомали Раҳмон ушбу унвонни икки мамлакат ўртасидаги дўстлик ва ҳамкорлик муносабатларини мустаҳкамлашга, илмий алоқалар, гуманитар ва маданий алоқаларни ривожлантиришга қўшган ҳиссаси, шунингдек, сув ва иқлим соҳасидаги глобал ташаббуслари учун олган.

Тақдирлаш маросими 10 март куни Тожикистон президентининг Қоҳира университетига ташрифи давомида бўлиб ўтган.

Ўз чиқиши давомида Эмомали Раҳмон «Тожикистон тинчлик ва осойишталикни сақлаш, барча низоларни тинч йўл билан ҳал этиш тарафдори сифатида дунёда ўзининг ноёб тажрибаси билан машҳур»лигини таъкидлаган.

Эмомали Раҳмон дунёдаги сиёсий вазиятга тўхталар экан, Тожикистон ва Миср ўртасида терроризм, экстремизм ва трансмиллий уюшган жиноятчиликка қарши курашда ҳамкорликни кенгайтириш, ахборот ва тажриба алмашиш жуда муҳим эканини қайд этган.

«Бирлашган ирода билан мамлакатларимиз ва ислом оламини терроризм ва радикализм таҳдидидан асрашимиз, муқаддас ислом динини таҳқирлашнинг олдини олишимиз керак», — дейди Тожикистон президенти.

Маълумот учун, Қоҳира университети Мисрнинг энг муҳим таълим ва тадқиқот даргоҳларидан ҳисобланади ва у 1908 йилининг 21 декабрида ташкил этилган. У қадимийлиги бўйича Мисрда иккинчи, араб оламида эса Ал-Азхар ва Ал-Карауин университетларидан кейин учинчи ўринда туради. Университет юқори малакали мутахассислар ва олимларни тайёрлашда муҳим ўринга эга. Ҳар йили таълим муассасасини 155 минг нафардан ортиқ талаба битиради.